fimmtudagur, 19. september 2019
 
TölublöðVenjuleg útgáfa

Síldveiðar með partrolli ganga vel

13. september 2011 kl. 14:44

Ingunn AK.

Þegar haustar er vænlegt til árangurs á sildveiðum að tvö skip dragi eitt troll.

Nú er kominn sá árstími að vænlegast þykir til árangurs á síldveiðunum að tvö skip veiði saman með einu, stóru flottrolli. Að sögn Guðlaugs Jónssonar, skipstjóra á Ingunni AK, ganga veiðarnar mjög vel og hið sama má segja um vinnslu HB Granda á Vopnafirði sem nú hefur úr nægu hráefni að moða eftir bræluna sem torveldaði skipunum veiðar í lok síðustu viku.

,,Við erum núna að toga með Faxa RE en við leystum Lundey NS af hólmi sem nú er á Vopnafirði með góðan afla,“ segir Guðlaugur á heimasíðu HB Granda. en Ingunn og Faxi voru að veiðum í Héraðsflóadjúpinu þegar rætt var við hann.

Að sögn Guðlaugs er það reynsla manna að heppilegra sé að tvö skip séu saman með stórt partroll á síldveiðunum þegar það kemur fram á haustið. Síldin sé stygg og því náist betri árangur með partrollinu en ef skipin væru að toga hvert með sínu trolli. Hann segir sömuleiðis að ástandið á síldinni sé gott. Hún sé stór og algeng meðalþyngd sé 380 til 410 grömm. Hægt er að veiða allan daginn en veiðin er að jafnaði best á kvöldin og fram á nóttina. Lítið er um makríl í aflanum en til marks um það má nefna að af um 625 tonna afla, sem Ingunn kom með til Vopnafjarðar í gær og nú er verið að vinna, voru aðeins um 25 tonn af makríl.