laugardagur, 18. janúar 2020
 
TölublöðVenjuleg útgáfa

Sjávarklasinn veitir viðurkenningar

29. janúar 2016 kl. 13:46

Frá afhendingu viðurkenninganna.

Fyrirtæki sem náð hafa eftirtektarverðum árangri með samstarfi.

Í dag  afhenti Ragnheiður Elín Árnadóttir iðnaðar- og viðskiptaráðherra sérstakar viðurkenningar til fyrirtækja innan Íslenska sjávarklasans sem náð hafa eftirtektarverðum árangri með samstarfi. Að þessu sinni fengu þrjú samstarfsverkefni viðurkenningu. 

Í fyrsta lagi er viðurkenning fyrir samstarf um að efla flutninga. Afrakstur þessa starfs er meðal annars ítarleg stefnumörkun um Flutningalandið Ísland til ársins 2030 og ráðstefna um málefni flutninga sem haldin er ár hvert. Að hópnum standa Icelandair Cargo, Eimskip, TVG Zimsen, Ekran, Kadeco, Lex, Stálsmiðjan, Íslandsbanki, Refskegg, Isavia, Faxaflóahafnir, Hafnarfjarðarhöfn og Akureyrarhöfn.

Í öðru lagi hljóta Marinvest, Frumtak og Controlant viðurkenningu fyrir samstarf frumkvöðla og fjárfesta innan klasans. Fjárfestar í Marinvest og Frumtaki hafa komið að sem hluthafar í frumkvöðlafyrirtækinu Controlant en það er nýsköpunarfyrirtæki sem býður tækni til eftirlits með matvælum og lyfjum. 

Í þriðja lagi hljóta Kerecis og og Rannsóknarmiðstöð bandaríska sjóhersins viðurkenningu fyrir rannsóknarsamstarf  en afrakstur þess varð samningur á milli þessara aðila um frekari þróun fiskroðs til meðhöndlunar á bráðasárum með það að markmiði að fækka dauðsföllum vegna slíkra áverka. 

Sjá nánar á vef Sjávarklasans.