fimmtudagur, 27. júní 2019
 
TölublöðVenjuleg útgáfa

Sjómannadagsblað Fiskifrétta er komið út

29. maí 2019 kl. 10:30

Forsíðumynd/Sumarliði Ásgeirsson

Fjölbreytt og efnismikið að vanda.

Það kennir margra grasa í sjómannadagsblaði Fiskifrétta sem kom út í dag. 

Meðal efnis:

54 ár á sjónum

Viðtal við Gísla V. Jónsson sem er í hópi fengsælustu skipstjóra landsins auk þess sem ferill hans hefur til þessa verið einkar farsæll. Hann hefur nú verið til sjós í 54 ár. Hjá Vísi í Grindavík hefur hann verið síðastliðin 23 ár og stýrt línuskipinu Páli Jónssyni GK frá árinu 2001.

Gleymdur afreksmaður

Jakob F. Ásgeirsson, sagnfræðingur og rithöfundur segir frá Jóni Gunnarssyni. Fáir menn hafa markað jafndjúp spor í atvinnusögu Íslendinga á tuttugustu öld. Hann byggði upp nánast af eigin rammleik stærsta fyrirtæki Íslendinga í útlöndum, Coldwater Seafood Corporation, dótturfyrirtæki Sölumiðstöðvar hraðfrystihúsanna í Bandaríkjunum.

Á hjarðeldi á þorski rétt á sér?

Grein eftir Björn Björnsson, sérfræðing á Hafrannsóknastofnun.

Skipstjóri ríflega tvítugur

Helgi Kristjánsson, sjómaður og einn aðstandenda tæknifyrirtækisins Knarr, segir frá því hvernig hann varð skipstjóri á togaranum Karlsefni, þá rétt rúmlega tvítugur. Hann tók einnig þátt í því að byggja upp fyrirtækið Naust Marine.

Sigga Vigga sextug

Nú er 60 ár síðan Sigga Vigga og meðreiðarsveinar hennar birtust fyrst lesendum – en hún var sköpunarverk Gísla J. Ástþórssonar blaðamanns á Alþýðublaðinu og Morgunblaðinu.

Sjókonur í rúm 100 ár

Margaret E. Wilson mannfræðingur í viðtali sem hefur rannsakað hlut kvenna um borð í íslenskum fiskveiðiskipum í gegnum söguna. 

Kútter Sigurfari

Uppi eru hugmyndir um að farga Kútter Sigurfara, einu best þekkta skipi íslenska flotans. Skipið er ónýtt og ekki talið mögulegt að varðveita það. Saga skipsins er hins vegar stórmerkileg og er sögð í blaðinu. 

Lærði kjólasaum en stjórnar krana

Snædís Ylfa Ólafsdóttir, einn af nokkrum kranastjórum Eimskips í Sundahöfn. Hún segir að hlutirnir séu sem betur fer að breytast og hópur kvenna starfi til að mynda á bílaflota, lyfturum og öðrum vinnuvélum hjá Eimskip. Starfsemi félagsins og forstjórinn í viðtali – ný skip verða afhent von bráðar.

Fjölfræðingurinn Bjarni Sæmundsson

Þessi fyrsti fiskifræðingur landsins kom víða við og honum var ekkert óviðkomandi við hafrannsóknir.

Sjómannadagskrossgáta og margt fleira