föstudagur, 15. janúar 2021
 
TölublöðVenjuleg útgáfa

Sjónvarpsmynd veldur söluhruni

12. apríl 2011 kl. 12:02

Pangasíus

Sala á eldisfiskinum pangasius hefur hrunið í Norður-Evrópu í kjölfar sjónvarpsmyndar.

Á síðustu vikum hefur eftirspurn eftir víetnamska eldisfiskinum pangasius í Norður-Evrópu hrunið í kjölfar sjónvarpsmyndar sem umhverfissamtökin World Wide Fund (WWF) hafa lagt nafn sitt við en myndin var sýnd í Þýskalandi fyrir einum mánuði.

Einkum hafa þýskir neytendur snúið baki við pangasiusnum en þar hefur verið stór markaður fyrir þennan fisk og neyslan á síðasta ári numið um 40.000 tonnum.

Í myndinni sem ber nafnið ,,Lygin um pangasiusinn” er dregin upp dökk mynd af eldinu í Víetnam, sagt að í eldistjörnunum sé vatn úr skólp- og efnamenguðu Mekong fljótinu auk þess sem notað sé ótæpilegt magn lyfja við eldið.

Á sjávarútvegsvefnum Seafoodsource.com kemur fram að þær alhæfingar sem fram voru færðar í sjónvarpsmyndinni hafi haft mjög skaðleg áhrif á öll eldisfyrirtæki í Víetnam þrátt fyrir að mörg þeirra hafi fengið alþjóðlegar vottanir um að vara þeirra sé heilnæm. Þannig hafi 379 víetnamskar eldisstöðvar staðist kröfur ESB þar að lútandi og hafa leyfi til að selja til ríkja sambandsins.

Það áfall sem fiskeldisfyrirtæki í Víetnam hafa nú orðið fyrir kemur til viðbótar miklum erfiðleikum í rekstri vegna aukins stórkostnaðar við eldið. Á síðasta ári nam framleiðsla á pangasius í Víetnam um 1,2 milljónum tonna en áætlað er að framleiðslan í ár verði 600-700 þúsund tonn.