sunnudagur, 26. janúar 2020
 
TölublöðVenjuleg útgáfa

Skollakoppur víða í Húnaflóa

15. janúar 2020 kl. 15:30

Skollakoppur. MYND/Hafró

Hafrannsóknastofnun birtir niðurstöður könnuna á ígulkeramiðum

Tvær nýjar skýrslur frá Hafrannsóknastofnun gera grein fyrir könnun á ígulkeramiðum í Ísafjarðardjúpi og Húnaflóa. Skollakoppur, einnig nefndur grænígull, er ígulkerategund. 

Notaður var ígulkeraplógur og tíu stöðvar skoðaðar á hvoru svæði. Þórishólmi ehf. stóð fyrir leiðöngrunum en eftirlitsmaður frá Fiskistofu var um borð og sá um skráningu á afla og myndatöku.

„Niðurstöður leiddu í ljós að engin nýtanleg ígulkeramið eru á þeim svæðum sem skoðuð voru í Ísafjarðardjúpi en skollakoppur fannst víða í Húnaflóa,“ segir í tilkynningu frá Hafrannsóknastofnun. „Á því svæði sem þéttleiki skollakopps var mestur, voru ígulkerin yfirleitt smá og undir löndunarstærð en auk þess var mikið af kóralþörungi á svæðinu. Á öðrum svæðum þar sem skollakoppur var í veiðanlegu magni var minna magn kóralþörunga, en þeir greindust á 4 af þeim 10 stöðvum sem voru skoðaðar. Greinóttir kóralþörungar mynda afar viðkvæm og fjölbreytileg búsvæði með hátt verndargildi. Þau eru talin mikilvæg fyrir ungviði nytjastofna og ætti því ekki að stunda plógveiðar á þeim.“