mánudagur, 22. júlí 2019
 
TölublöðVenjuleg útgáfa

Slök þorskveiði í haust og vetur

28. nóvember 2017 kl. 08:31

Helga María AK (Mynd af vef HB Granda)

Skot kom í veiðina á síðustu dögum - þá var mok hjá 30 skipum

Þorskveiði hefur verið slök í haust og það sem af er vetri, sýnir yfirlit Birkis Hrannars Hjálmarssonar, útgerðarstjóra ísfisktogara HB Granda. Þannig var staðan allt að síðustu helgi en þá fengu skipin mjög góðan þorskafla á Vestfjarðamiðum.

Í frétt HB Granda þarf að fara tíu ár aftur í tímann, eða allt aftur til þess tíma þegar þorskkvótinn var skertur verulega, til að finna dæmi um jafn slaka þorskveiði á haustmánuðum og í vetrarbyrjun.

Í fréttinni segir að vert sé að hafa í huga að aflatölur fram að nýliðinni helgi voru til skoðunar og eftir að koma í ljós hvort það skot, sem kom í þorskveiðina sl. laugardag á Vestfjarðamiðum, bendi til aukinnar veiði næstu vikurnar.

Að sögn Birkis Hrannars er þó ljóst að haustveiði á þorski hefur verið mun dræmari í ár og í fyrra en í mörg ár þar á undan. Hann segir að síðastliðnar vikur hafi verið dræmar fyrir vestan og í fleiri skipti en færri hafi skipin ekki náð þeim þorski sem þeim hafi verið ætlaður. Besta veiðin hafi verið yfir nóttina og jafnvel þá hafi komið fyrir að skipin hafi ekki náð tonni á togtímann.

„Líklega hefur bolfiskveiðin frá 2009 til 2015 verið heilt yfir mjög góð, þ.e.a.s. í þorski, ufsa og karfa. Þá þótti gott ef t.d. Sturlaugur H. Böðvarsson AK kom með 60-65 tonn af tveggja kílóa þorski og lítið með því eftir fimm daga á Vestfjarðamiðum. Hér áður fyrr var þorskveiðin svona og e.t.v. var maður bara orðinn góðu vanur,“ segir Birkir Hrannar Hjálmarsson.

Skot fyrir vestan
„Haustið og það sem er er vetri hefur verið mjög slakt hvað varðar þorskveiðina og fyrsta eiginlega skotið kom ekki fyrr en sl. laugardag. Það var í Þverálnum og þar var mokveiði eða 60 tonna dagur. Þetta er langbesta veiðin sem fengist hefur frá því sl. sumar og það er ekki laust að ákveðin fortíðarþrá hafi gert vart við sig því þarna voru einir 30 togarar að veiðum og það var mokafli hjá þeim öllum,“ segir Heimir Guðjónsson, skipstjóri á Helgu Maríu AK, togarinn kom til Ísafjarðar á sunnudag með tæp 150 tonn.

Fiskurinn er afrakstur um fjögurra daga veiðiferðar á Vestfjarðamið en síðustu þrjár landanir togarans hafa verið á Ísafirði og hefur aflanum verið ekið suður til Reykjavíkur til vinnslu.

„Við vorum reyndar ekki búnir að vera nema sólarhring að veiðum þegar við fórum inn til Ísafjarðar sl. þriðjudag með tæplega 20 tonn af þorski. Það var spáð enn einum hvellinum á miðunum og því var ekki um annað að ræða en að leita hafnar. Í túrnum á undan vorum við svo með um 120 tonn sem einnig fóru í land á Ísafirði,“ segir Heimir í frétt HB Granda en að hans sögn hafa ísfisktogarar fyrirtækisins nýtt sér Ísafjörð sem löndunarhöfn upp á síðkastið.

Halinn var steindauður
„Það er ekki gert sérstaklega til að draga úr siglingum með aflann heldur vegna þess að þegar þorskveiðin hefur verið jafn treg og raun ber vitni í allt haust og vetrarbyrjun þá er nauðsynlegt að hanga á þorskinum á meðan hann gefur sig til og missa helst aldrei sjónar á því hvert hann er að fara. Þetta hefur svo sem gengið upp og ofan og fyrir síðustu helgi var ástandið orðið afleitt. Við vorum e.t.v. að fá eitt og hálft tonn af þorski á tímann yfir nóttina og svo var ekkert að hafa yfir daginn. Halamiðin voru steindauð og það var helst að Þverállinn og Strandagrunnið væru að bjarga okkur,“ segir Heimir í fréttinni en hann upplýsir að loðna hafi ekki sést í þorskinum á Halanum í vetur fyrr en að vart varð við hana um helgina.

,,Það hefur verið einhver loðna eða æti austur á Strandagrunni í vetur en það er fyrst nú að vart verður við æti á Halanum. Fyrir bræluna sást loðnan ekki en nú er hún komin og þorskurinn með.“

Að sögn Heimis hefur önnur veiði ekki verið merkileg í vetur. Kominn sé sá tími að aðeins er hægt að eiga við gullkarfa í fáa klukkutíma á degi hverjum. 

,,Karfinn gefur sig bara til í birtunni og ef ekki er dimmt yfir þá getum við vænst þess að fá karfa frá því skömmu fyrir hádegi og þar til að rökkva tekur síðdegis. Það var fín karfaveiði í allt sumar og fram eftir hausti, m.a. í Víkurálnum og í kantinum úti af Vestfjörðum, en þessi veiði hefur dalað mjög mikið,“ segir Heimir Guðbjörnsson.