laugardagur, 27. febrúar 2021
 
TölublöðVenjuleg útgáfa

Smá vertíðarstemning að komast á veiðina

22. janúar 2021 kl. 09:30

Viðey RE. Mynd/Brim/ Kristján Maack

Viðey í moki í síðasta túr en leitar nú að þorski á sömu slóð.

„Það er afskaplega rólegt yfir þessu hjá okkur. Við erum í Víkurálnum og hér er leiðinda bræla. Við erum að leita að þorski en höfum ekki fundið hann í neinu magni enn sem komið er. Hér var mokveiði af stórum og góðum þorski í síðasta túr en þá náðum við fullfermi eftir góða ufsaveiði út af Reykjanesgrunni.”

Þetta segir Kristján E. Gíslason, skipstjóri á Viðey RE, í viðtali við heimasíðu Brims í gær. Kristján segir að allt hafi gengið upp í síðasta túr en honum lauk sl. sunnudagskvöld.

„Svona getur þetta verið dyntótt. Nú finnst varla þorskur þar sem allt var vaðandi af stórþorski fyrir aðeins nokkrum dögum. Við eigum ekki að vera í landi fyrr en á mánudag þannig að það gefast nokkrir dagar til að finna þorskinn,” segir Kristján en hann segir framhald túrsins óráðið. Tæpast taki því að reyna fyrir sér á Halamiðum, að hans mati enda hafi Halinn verið óvenju daufur í vetur. Ekki sé einu sinni víst að þar sé hægt að stunda þar veiðar þessa dagana. Hafís hafi gert sig heimakominn á Halanum og oftar en ekki hafi skipin þurft frá að hverfa á síðustu vikum.

Svo vikið sé nánar að aflabrögðunum syðra segist Kristján ekki vera frá því að smá vertíðarstemning sé að komast á veiðina.

„Stórþorskurinn er mættur og svo hittum við á mjög stóran og fallegan ufsa á utanverðu Reykjanesgrunni. Við enduðum túrinn þar og náðum að fylla. Ætli heildaraflinn hafi ekki verið rúm 180 tonn,” sagði Kristján.