miðvikudagur, 21. ágúst 2019
 
TölublöðVenjuleg útgáfa

Smábátar á síldveiðum búnir með skammtinn

5. nóvember 2013 kl. 09:06

Síldinni landað. (Mynd: Sumarliði Ásgeirsson)

26 bátar hafa veitt samtals 310 tonn

Síldveiðar smábáta á Breiðafirði hafa gengið vel á undanförnum dögum.  Aflinn var í gær kominn í 310 tonn hjá þeim 26 bátum sem byrjaðir eru.

Andri SH 450 hefur landað mestum afla 24 tonnum, en hann á nú aðeins eftir að veiða 4 tonn af því sem hann fékk úthlutað, sem næst væntanlega að mestu í einni veiðiferð.  Svipuð staða er uppi hjá flestum þeirra báta sem nú eru á veiðum þeir stöðvast á næstu dögum.

Í frétt á vef LS segir að Sigurður Ingi Jóhannsson sjávarútvegsráðherra fari nú yfir stöðu veiðanna og vænti trillukarlar þess að hann auki við kvótann, enda aðeins búið að úthluta 498 tonnum.  Auk þess hafi 45 tonn bæst við frá síðasta ári.  Samkvæmt bráðabirgðaákvæði laga um stjórn fiskveiða hefur ráðherra til ráðstöfunar, til sérstakrar úthlutunar, 2.000 lestir af íslenskri sumargotssíld.

Alls hafa 42 bátar fengið úthlutað síldarkvóta frá Fiskistofu sem þeir greiða fyrir 13 kr / kg.