sunnudagur, 13. júní 2021
 
TölublöðVenjuleg útgáfa

Stór makríll að veiðast

26. júlí 2018 kl. 10:25

Venus NS. (Mynd af vef HB Granda)

Enn þarf að hafa nokkuð fyrir því að finna makríl í veiðanlegu magni.

 Uppsjávarveiðiskip HB Granda - Venus NS - er í heimahöfn á Vopnafirði en þangað kom skipið í fyrrinótt með um 600 tonn af makríl sem fara til vinnslu hjá uppsjávarfrystihúsi HB Granda á staðnum. Meðalstærðin á makrílnum er 420-440 grömm og þetta er því stór og góður fiskur.

Frá þessu segir á heimasíðu fyrirtækisins.

Að sögn Kristjáns Þorvarðarsonar skipstjóra á Venusi þarf enn að hafa nokkuð fyrir því að leita að makríl í veiðanlegu magni en hann segir greinilegt að makríllinn sé að ganga upp á grunnin fyrir sunnan land. Þess verði væntanlega skammt að bíða að hann þétti sig betur á gönguleið sinni austur og norður með Austfjörðum.

,,Við enduðum veiðiferðina í Háfadjúpi alveg vestur undir Vestmannaeyjum en sum Eyjaskipanna hafa farið enn sunnar og vestar. Svo virðist þó sem að besta veiðin núna sé austan við Kötlugrunn og það kemur heim og saman við þá tilfinningu okkar að fiskurinn sé á austurleið. Það er makríll í köntunum en það verður mun betra að eiga við hann uppi á grunnunum,“ segir Kristján í frétt HB Granda.