miðvikudagur, 20. janúar 2021
 
TölublöðVenjuleg útgáfa

Sýking síldarinnar könnuð

16. janúar 2011 kl. 18:09

Síld.

Dröfn RE heldur til síldarrannsókna í Breiðafirði á morgun.

Á morgun mun Dröfn RE halda af stað frá Reykjavík í Breiðafjörð til síldarrannsókna. Markmiðið er að kanna útbreiðslu stofnsins þar, magnmæla hann og síðast en ekki síst að meta Ichthyophonus sýkinguna sem herjað hefur á stofninn frá árinu 2008 og valdið miklum afföllum bæði í ungsíld sem og veiðistofninum. Eins og undanfarna tvo vetur hefur verið fylgst með þróun sýkingarinnar yfir alla vertíðina, og er þessi rannsóknarleiðangur liður í því. Dröfn var einnig á þessum slóðum í október sl. við rannsóknir og byggði Hafrannsóknastofnunin tillögur um aflamark á síld fyrir yfirstandandi vertíð m.a. á niðurstöðum þeirra. Sýni tekin úr afla nótaskipa hafa reynst mikilvægari en trollsýni rannsóknaskipa til að meta sýkinguna í stofninum en eitt síldarskip er enn við veiðar í Breiðafirði, Hákon EA. Áætlað er að Dröfnin verði við mælingar í fimm daga að þessu sinni og svo aftur í fimm daga á sömu slóðum undir lok febrúar, að því er segir á vef Hafrannsóknastofnunarinnar.