þriðjudagur, 24. september 2019
 
TölublöðVenjuleg útgáfa

Telur afkomu Brims hf. vera á réttri leið

30. ágúst 2019 kl. 08:00

Helga María AK - nú RE 1. Mynd/Brim

Rekstrartekjur Brim - áður HB Granda - voru fimmtán milljarðar króna og hagnaður 1,5 milljarðar.

Uppgjör Brims hf., á öðrum ársfjórðungi 2019 liggur fyrir. Rekstrartekjur samstæðunnar voru fimmtán milljarðar króna, EBITDA 3,2 milljarður og hagnaður 1,5 milljarðar. Séu niðurstöður efnahagsreiknings reiknaðar til íslenskra króna á gengi 30. júní 2019 (1 evra = 141,3 kr) verða eignir samtals 91,8 milljarðar króna, skuldir 52,8 milljarðar og eigið fé 39 milljarðar.

Í tilkynningu frá fyrirtækinu er haft eftir Guðmundi Kristjánssyni, forstjóra félagsins, að hann telji afkomu á fyrri hluta ársins benda til þess að Brim sé á réttri leið.

„Með kaupunum á Ögurvík á síðasta ári fjárfestum við í auknum veiðiheimildum sem meðal annars skila sér nú í bættri afkomu félagsins. Brim er stórt félag með mikla fjármuni undir og áhættan talsverð vegna utanaðkomandi sveiflna. Arðsemin verður að vera góð til að borga skuldir og fjárfesta í nýjum og fullkomnum framleiðslutækjum bæði í landi og úti á sjó. Þá megum við heldur ekki gleyma því að það kostar sitt að tryggja okkur aðgang að mörkuðum sem greiða gott verð fyrir afurðir okkar. Það eru víða tækifæri til að gera betur og ég er sannfærður um að við getum nýtt okkur þau,“ segir Guðmundur í tilkynningunni.

Í lok júní gerði samstæðan út 7 fiskiskip, en ísfiskstogarinn Engey RE-1 var seldur í byrjun júní. Ísfiskstogarinn Helga María AK-16 ([nú RE 1] hefur verið í leiguverkefni á Grænlandi, en gert er ráð fyrir henni aftur í rekstur með haustinu.

Á fyrri árshelmingi ársins 2019 var afli skipa samstæðunnar 26,500 tonn af botnfiski og 43,600 tonn af uppsjávarfiski.

Á hluthafafundi sem haldinn var í félaginu 15. ágúst staðfesti hluthafafundur ákvörðun stjórnar um kaup félagsins á öllu hlutafé í sölufélögum í Japan, Hong Kong og á meginlandi Kína sem og þjónustufélagi á Íslandi. Greitt verður fyrir eignarhlutina með útgáfu nýrra hluta í félaginu, en samanlagt kaupverð eignarhlutanna nemur 34,9 millj. dollara. Kaupverðið getur þó lækkað nái félögin ekki tilteknum rekstrarhagnaði.

Á hluthafafundi sem haldinn var þann 15. ágúst var nafni félagsins breytt úr HB Granda hf. í Brim hf.