mánudagur, 21. júní 2021
 
TölublöðVenjuleg útgáfa

Þorskur og loðna leita í rússneska lögsögu

2. janúar 2014 kl. 13:09

Rannsóknaleiðangur í Barentshafi. (Mynd: Norska hafrannsóknastofnunin

Færir Rússum tromp á hendi í samningaviðræðum um kvótaskiptingu.

Þorskur og loðna í Barentshafi  hafa á undanförnum árum leitað æ lengra norður og austur í hafið. Þetta stafar af stækkun þessara stofna, hækkun sjávarhita og bráðnun íss. Í rannsóknaleiðöngrum nýliðins árs fannst loðna austar í nokkru sinni fyrr og það sama var að segja um þorskinn sem væntanlega hefur verið að elta loðnuna. 

Ef þetta útbreiðslumynstur verður viðvarandi gæti það fært Rússum tromp á hendi í samningaviðræðum í kvótaskiptingu þessara stofna í framtíðinni, segir á norska vefnum forskning.no. Núna er meirihluti hrygningarsvæða þorsks og loðnu við norsku ströndina en ef hrygningin flyst líka í auknum mæli inn í rússneska lögsögu verða Rússar í enn betri samningsstöðu. Í því sambandi má nefna að kvótaskiptingin milli Noregs og Rússlands hefur verið óbreytt í næstum 40 ár. 

Sú spurning hefur vaknað hvort aukin hlýnun á norðurslóðum kunni að leiða til þess að fiskistofnar leiti enn norðar, framhjá Svalbarða og inni í Norður-Íshafið. Norskir fiskifræðingar telja það ólíklega þróun. Líklegra sé að þessir stofnar leiti í auknum mæli inn í Karahafið sem er hafsvæðið norðan og austan við eyjarnar Novaja Semlja, sem er að öllu leyti í rússneskri lögsögu.