mánudagur, 21. júní 2021
 
TölublöðVenjuleg útgáfa

Þriggja milljarða samningur

31. janúar 2014 kl. 09:31

Búnaðurinn verður hliðstæður þeim sem er í verksmiðju Varðin Pelagic í Færeyjum. Hér fyrir neðan: Ingólfur Árnason, framkvæmdastjóri Skagans hf., og Þorgeirs & Ellerts hf. (t.h.) og Eyðun Rasmussen frá Christian í Grótinum handsala samninginn í Færeyjum.

Skaginn og Kælismiðjan Frost smíða uppsjávarvinnslukerfi í nýja verksmiðju í Færeyjum.

Skaginn hf. og Kælismiðjan Frost ehf. hafa undirritað samning við nýtt félag í Færeyjum, P/f Pelagos, um kaup þess á nýju uppsjávarvinnslukerfi til uppsetningar í Fuglafirði á aðeins rúmlega sex mánuðum. Heildarverðmæti samningsins er rúmir þrír milljarðar króna. 

Vinnslan í Fuglafirði verður við hlið Havsbrun, öflugrar fiskimjölsverksmiðju, en eigendur hennar eru aðilar að P/f Pelagos ásamt útvegsfyrirtækjunum Christian í Grótinum og Framherja, sem er hlutdeildarfélag Samherja í Færeyjum. 

Vinnsla hefst í Fuglafirði strax í ágúst nk. og miðast afköst við 600 tonn á sólarhring. Stefnt er að því að auka afköstin í 1000 tonn. Ýmsar nýjungar munu birtast í nýju verksmiðjunni í Fuglafirði sem auka afköst og gæði vinnslunnar. 

Kælismiðjan Frost ehf. annast alla uppbyggingu á frystikerfi verksmiðjunnar en systurfyrirtækin Skaginn hf. og Þorgeir & Ellert hf. leiða vinnu við byggingu verksmiðjunnar ásamt Kælismiðjunni Frosti ehf. og 3X Technology á Ísafirði. Kaupendurnir sjá um uppbyggingu húsnæðisins í samræmi við innri hönnun Skagans hf. 

Verksmiðjan í Fuglafirði verður byggð upp á svipaðan hátt og hjá Varðinn Pelagic á Tvøroyri sem Skaginn hf. afhenti árið 2012. Hún tók á móti um 100 þús. tonnum af hráefni á síðasta heila rekstrarári sínu.