laugardagur, 27. febrúar 2021
 
TölublöðVenjuleg útgáfa

Þrjú skip til loðnumælinga með stuttum fyrirvara

18. janúar 2021 kl. 11:32

Fyrirhugaðar leiðarlínur skipanna þriggja þar sem rauða línan er ætluð Bjarna Ólafssyni til að afmarka dreifinguna.

Aðdragandi mælinganna er sá að fréttir bárust á laugardeginum frá togveiðiskipum um loðnu í kantinum út af miðjum Austfjörðum.

Nú um helgina var haldið aftur til mælinga á stærð loðnustofnsins á uppsjávarskipunum Ásgrími Halldórssyni SF og Polar Amaroq. Líkt og í fyrri mælingum eru þrír sérfræðingar Hafrannsóknastofnunar um borð í hvoru skipi. Bjarni Ólafsson AK er jafnframt með í verkefninu með það hlutverk að afmarka dreifingu loðnunnar til að flýta fyrir mælingum.

Þetta kemur fram í tilkynningu frá Hafrannsóknastofnun. Morgunblaðið sagði fyrst frá í morgun.

Aðdragandi mælinganna er sá að fréttir bárust á laugardeginum frá togveiðiskipum um loðnu í kantinum út af miðjum Austfjörðum. Í kjölfarið fór uppsjávarskipið Víkingur, sem var á leið til löndunar á Vopnafirði af kolmunnamiðunum, yfir svæðið og staðfesti að þetta væri eitthvert magn sem væri að sjá við kantinn frá Hvalbakshalla og allavega um 50 sjómílur þaðan í norður.

Stefnt er á að ná mælingu þarna á næstu dögum og fá m.a. mat á hvort þetta sé hrein viðbót við síðustu mælingar frá því í byrjun janúar eða þetta sé hluti af þeirri loðnu sem fannst norður af Langanesi á þeim tíma og gengið þetta langt í suður síðan þá.

Framhald þessara mælinga fyrir austan verður metið á næstu dögum með tilliti til veðurs og loðnumagns á svæðinu.