sunnudagur, 18. ágúst 2019
 
TölublöðVenjuleg útgáfa

Tveir milljarðar til að hreinsa olíumengun vegna strands Goðafoss

2. mars 2011 kl. 15:05

Goðafoss

Ríkisstjórn Noregs heimilar norsku Siglingastofnuninni að fara 110 milljónum NOK framúr fjárveitingum til stofnunarinnar 2011

Siglingastofnunin í Noregi hefur fengið heimild til að verja um 110 milljónum norskra króna, eða um 2,3 milljörðum íslenskra króna, til að greiða fyrir hreinsun á olíumengun vegna strands Goðafoss í síðustu viku í Óslóarfirði.

Þar með hefur Siglingastofnunin fengið nægilegt fjármagn til að standa straum af kostnaði við hreinsunaraðgerðir, segir Berg-Hansen, sjávarútvegsráðherra Noregs.

Ríkisstjórn Noregs samþykkti í vikunni að Siglingastofnunin fengi heimild til að fara 110 milljónum NOK fram úr fjárveitingum til stofnunarinnar árið 2011 til að mæta nauðsynlegum kostnaði við hreinsunina. Þegar endanlegur kostnaður liggur fyrir verður það metið hvort nauðsynlegt sé að leggja fyrir Stórþingið tillögu um framlag á aukafjárlögum.

Tekið er fram að samkvæmt lögum sé sá sem veldur mengun af þessu tagi ábyrgur fyrir kostnaði við hreinsun. Norska ríkið muni því krefjast endurgreiðslu á útlögðum kostnaði.

Heimild: Regjeringen.no