sunnudagur, 13. júní 2021
 
TölublöðVenjuleg útgáfa

Útvegsmenn funda um dauða síld í Breiðafirði

21. desember 2011 kl. 17:37

Síldveiðar utan við Stykkishólm (Mynd: Áhöfnin á Hoffelli SU).

Síldarútgerðir leggja áherslu á að umgengni um síldarmiðin verði sem best.

Undanfarna daga hafa birst fréttir af dauðri síld á Breiðafirði. Af því tilefni hafa útgerðir síldarskipa fundað og farið yfir þær upplýsingar sem fyrir liggja. Friðrik J. Arngrímsson, framkvæmdastjóri LÍÚ, segir á vef samtakanna að fram hafi komið að á vissum stöðum séu aðstæður til veiðanna erfiðar, þar sem þær séu stundaðar á mjög grunnu vatni. Botnlag sé misjafnt og straumar sterkir sem hafi óhjákvæmilega leitt til þess að nætur hafi rifnað og síld sloppið út jafnvel þó að ýtrustu varúðar hafi verið gætt.   

Á undanförnum árum hefur langstærstur hluti íslenska síldarstofnsins haft vetursetu á mjög afmörkuðum svæðum á Breiðafirði. Sem dæmi má nefna að yfir sjö hundruð þúsund tonn af síld mældust með bergmálsmælingu á Kiðeyjarsundi þegar mest var. Frá því að Ichthyophonus hoferi sýkingin kom upp í stofninum haustið 2008 hafa hundruð þúsunda tonna af síld drepist, m.a. á Breiðafirði.

Friðrik segir að útgerðir síldarskipa leggi áherslu á að umgengni um síldarmiðin verði eins góð og best verður á kosið. Í því skyni hafi verið ákveðið að samstarf útgerðanna um veiðarnar verði enn nánara á næstu vertíð en verið hefur við að miðla afla á milli skipa og til að draga úr hættunni á að óhöpp verði við veiðarnar. „Útgerðirnar taka fréttir af dauðri síld á Breiðafirði mjög alvarlega og munu leggja sig allar fram um að áhrif veiðanna verði eins lítil og mögulegt er," segir Friðrik J. Arngrímsson.