sunnudagur, 13. júní 2021
 
TölublöðVenjuleg útgáfa

Viðhalda ósætti og skerða kjör sjómanna

10. apríl 2012 kl. 10:17

Skipstjórnarmaður í brúnni. (Mynd: Kristinn Benediktsson).

FFSÍ og Félag skipstjórnarmanna mótmæla frumvörpum ríkisstjórnarinnar.

Fundur í stjórn Farmanna- og fiskimannasambands Íslands og Félagi skipstjórnarmanna mótmælir harðlega framkomnum  frumvörpum um stjórn fiskveiða og um veiðigjöld.

Í ályktun fundarins segir:

,,Verði þessi frumvörp, sem eru unnin án alls samráðs við atvinnugreinina, að lögum, munu þau viðhalda og jafnvel auka ósætti innan greinarinnar með ófyrirsjáanlegum afleiðingum.  Með skerðingum aflaheimilda munu kjör sjómanna versna verulega og leigubrask sem stjórnvöld ætla nú að takast á hendur mun aukast.  Til viðbótar við þá skerðingu sem stjórnvöld stóðu fyrir með afnámi sjómannaafsláttar er þetta fráleitt framferði gagnvart einni starfsstétt og sýnir í hnotskurn hvaða hug ríkjandi stjórnvöld bera til þeirrar starfsgreinar sem mestu hefur skilað við að draga vagn þjóðarbúskaparins við að skapa útflutningsverðmæti á erfiðum  tímum undanfarin misseri.“