þriðjudagur, 24. nóvember 2020
 
TölublöðVenjuleg útgáfa

Vinna um borð í nýja Berki gengur vel

30. október 2020 kl. 11:01

Nýi Börkur er glæsilegt skip og kemur heim til Neskaupstaðar á næsta ári. Mynd/Síldarvinnslan

Um 120 starfsmenn Karstensens Skibsværft eru að störfum við nýsmíðina og sinna ýmsum verkefnum.

Börkur, nýtt uppsjávarskip Síldarvinnslunnar, liggur í Skagen í Danmörku þar sem unnið er af krafti um borð í skipinu. Um 120 starfsmenn Karstensens Skibsværft eru þar að störfum og sinna ýmsum verkefnum. Þeir Karl Jóhann Birgisson og Jóhann Pétur Gíslason vélstjóri dvelja í Skagen og fylgjast með öllum framkvæmdum fyrir hönd Síldarvinnslunnar.

Heimasíða fyrirtækisins ræddi við Karl Jóhann um smíðina. „Hér gengur allt mjög vel. Það er unnið samkvæmt áætlun og hún virðist standast ágætlega. Það er verið að vinna allsstaðar í skipinu; til dæmis er byrjað er að klæða veggi, það er unnið í pípulögnum, verið að koma öllum vindum fyrir og eins er unnið í rafkerfinu. Mörg þessara verka eru umfangsmikil og má nefna hvað rafkerfið varðar að lagðir veða 90 kílómetrar af köplum. Það sem einkennir störfin hér er mjög gott skipulag og mikil fagmennska. Þá er áberandi að hér eru notuð gæðaefni. Það fer vel um okkur Jóhann Pétur hérna og ekki skemmir fyrir að veðrið hefur verið gott. Við erum búnir að kaupa okkur hjól og hjólum í vinnuna og um bæinn. Við getum ekki kvartað yfir neinu,“ segir Karl Jóhann.