laugardagur, 16. janúar 2021
 
TölublöðVenjuleg útgáfa

Vorrall Hafró byrjað

2. mars 2010 kl. 10:54

Verkefnið Stofnmæling botnfiska á Íslandsmiðum, eða svokallað vorrall, hófst síðustu helgina í febrúar og stendur yfir næstu þrjár vikurnar. Fimm skip taka þátt í verkefninu; togararnir Bjartur, Ljósafell og Jón Vídalín og rannsóknaskipin Bjarni Sæmundsson og Árni Friðriksson.

Alls verður togað á um 600 stöðvum vítt og breitt á landgrunninu á 20-500 m dýpi.

Vorrallið hefur verið framkvæmt með sambærilegum hætti á hverju ári síðan 1985. Helstu markmið eru að fylgjast með breytingum á stofnstærðum, aldurssamsetningu, fæðu, ástandi og útbreiðslu helstu fisktegunda við landið, og hitastigi sjávar. Ennfremur er safnað sýnum vegna ýmissa rannsókna, t.d. á mengandi efnum í sjávarfangi.

Helmingur togstöðva var í upphafi staðsettur af reyndum skipstjórum en öðrum stöðvum var dreift um miðin með tilviljunarkenndum hætti. Undanfarin tvö ár hafa einnig verið teknar færanlegar skipstjórastöðvar í útköntum fyrir norðvestan og norðaustan land.

Úrvinnsla mælinganna og aldursgreiningar fara fram í lok mars og fyrstu niðurstöður verða kynntar í apríl.

Sjá nánar togstöðvar á vef Hafrannsóknastofnunar HÉR. Þar er jafnframt hægt að fylgjast með staðsetningu rallskipanna í rauntíma.