fimmtudagur, 14. desember 2017
 
TölublöðVenjuleg útgáfa

35.000 tonnum meiri kolmunnaveiði en í fyrra

5. desember 2017 kl. 13:54

Börkur NK að landa í Neskaupstað. Ljósm. Smári Geirsson

Aflahæsta skipið í kolmunnaveiðum á þessari vertíð er Börkur NK-122

Íslensk skip hafa veitt rúm 198.000 tonn af kolmunna það sem af er ári, eða um 35.000 tonnum meira en á sama tíma í fyrra. Mestur afli á þessari vertíð er fenginn að venju í lögsögu Færeyja eða rúm 162.000 tonn og í íslenskri lögsögu 26,500 tonn. Aflahæsta skipið í kolmunnaveiðum á þessari vertíð er Börkur NK-122 með 18.772 tonn. Næst kemur Bjarni Ólafsson AK-70 með 17.105 tonn.

Þetta kemur fram í yfirliti Fiskistofu um afla fyrstu ellefu mánuði ársins í  norsk-íslenskri síld, makríl, úthafskarfa á Reykjaneshrygg og kolmunna.

Litlu minni makrílafli en á síðasta ári
Makrílvertíð er lokið og er heildarafli íslenskra skipa á vertíðinni 167.000 tonn. Þetta er litlu minni afli en á sama tíma í fyrra þegar hann var 168.000 tonn. Íslensk skip fengu 106.200 tonn eða 63,5% aflans í íslenskri lögsögu en 57.800 tonn á alþjóðlegu hafsvæði.

Aflahæsta skipið á makrílveiðunum á vertíðinni er Venus NS-150 með 11.723 tonn. Næst kemur Víkingur AK-100 með 11.400 tonn og Vilhelm Þorsteinsson EA-11 með 10.560 tonn.

Tæplega helmingi meiri síldarafli en á síðasta ári
Heildarafli íslenskra skipa í norsk-íslenskri síld er það sem af er ári 90.000 tonn en á síðasta ári var aflinn 50.000 tonn. Aflinn er að mestu fenginn úr  íslenskri lögsögu eða  58.968 tonn (65%) og 26.000 tonn úr færeyskri lögsögu.