miðvikudagur, 19. september 2018
 
TölublöðVenjuleg útgáfa

Aflaverðmæti dróst saman um 17,3% frá fyrra ári

14. ágúst 2018 kl. 10:14

Þorskur á ís.

Aflaverðmæti botnfiskafla nam rúmum 76 milljörðum króna árið 2017 og dróst saman um 17,7% frá fyrra ári.

Árið 2017 var afli íslenskra skipa tæplega 1.177 þúsund tonn, 109 þúsund tonnum meiri en árið 2016. Aflaverðmæti fyrstu sölu var um 110 milljarðar króna og dróst saman um 17,3% frá fyrra ári.

Þetta kemur fram í frétt Hagstofu Íslands. Þar segir ennfremur:

Alls veiddust tæplega 426 þúsund tonn af botnfiski árið 2017 sem er 30 þúsund tonnum minna en árið 2016. Aflaverðmæti botnfiskafla nam rúmum 76 milljörðum króna árið 2017 og dróst saman um 17,7% frá fyrra ári.

Líkt og fyrri ár veiddist mest magn af uppsjávartegundum, en af þeim veiddust rúmlega 718 þúsund tonn árið 2017 sem er aukning um 143 þúsund tonn miðað við árið 2016. Munar þar mestu um ríflega 89 þúsund tonna aukningu í loðnuafla og 42 þúsund tonna aukningu á kolmunna. Verðmæti uppsjávarfisks árið 2017 nam tæpum 23,8 milljörðum króna og dróst saman um 14,6% frá árinu 2016 þegar aflaverðmætið nam tæpum 28 milljörðum króna.

Tæp 22 þúsund tonn af flatfiski veiddust árið 2017 sem er 8,4% samdráttur frá fyrra ári. Verðmæti flatfiskafurða nam tæpum 7,5 milljarði króna og dróst saman um 17,3% miðað við 2016. Af skel- og krabbadýrum veiddust 10,6 þúsund tonn sem er 15,5% samdráttur frá árinu 2016. Verðmæti skel- og krabbadýraafurða dróst einnig saman og nam rúmum 2,4 milljörðum króna samanborið við tæpa 3,5 milljarða árið 2016.