föstudagur, 19. október 2018
 
TölublöðVenjuleg útgáfa

Afurðaverð hefur hækkað um 7% í erlendri mynt á tæpu ári

29. janúar 2010 kl. 10:10

 Verð á íslenskum sjávarafurðum (meðaltal allra afurðaflokka) mælt í erlendri mynt hækkaði um 1,1% í desember síðastliðnum samkvæmt útreikningum IFS greiningar m.v. tölur um framleiðsluverð í desember sem Hagstofan birti í morgun.

Afurðaverð hefur smám saman hækkað frá og með öðrum fjórðungi 2009. Nú er verðið að meðaltali 7% hærra en í mars 2009 mælt í erlendri mynt. Síðustu þrjá mánuði hefur verðið hækkað um 5,4%. Tölurnar fyrir desember sýna að aðstæður á mörkuðum erlendis eru að batna og betra jafnvægi að myndast.

Verð á sjófrystum botnfiskafurðum hefur hækkað í verði undanfarið og skýrir þessa hækkun að hluta til. Þess ber að geta að sjófrystu afurðirnar lækkuðu mjög mikið í fyrra. Aflaverðmæti hjá íslenskum frystitogurum er mjög hátt um þessar mundir vegna veikrar stöðu ISK og hækkandi afurðaverðs. Verð á fiskimjöli er sögulega hátt og hefur hækkað mikið undanfarið. Það er mikið í húfi fyrir íslensku sjávarútvegsfyrirtækin að loðnan finnist nú á vetrarvertíðinni.

Afurðaverð í erlendri mynt er nú  álíka hátt og um mitt ár 2006. Núverandi verð er ásættanlegt fyrir flest íslensku sjávarútvegsfyrirtækin að mati IFS greiningar.