þriðjudagur, 16. janúar 2018
 
TölublöðVenjuleg útgáfa

Árið 2008 var án dauðaslysa á sjó

2. janúar 2009 kl. 13:16

fyrsta árið frá landnámi

Nýliðið ár var einstakt að því leyti að enginn lét lífið í sjóslysi á íslenskum skipum. Vegna náinna tengsla við hafið og mikilvægis sjósókna frá upphafi, er þetta einstakt og jafnvel hægt að leiða að því líkur að 2008 hafi verið fyrsta árið frá landnámi án banaslysa á sjó, að því er segir í frétt á heimasíðu Siglingastofnunar Íslands.

Á síðustu öld fórust í sjóslysum og drukknuðu í sjó, ám og vötnum yfir 4.000 manns samkvæmt upplýsingum frá Hagstofunni. Á síðari hluta aldarinnar fór banaslysum á sjó mjög fækkandi miðað við það sem áður var og sú þróun hefur haldið það sem af er þessum áratug. 

 Skýringar framfaranna eru margvíslegar. Skipakostur hefur batnað, öryggiskröfur til skipa hafa aukist en einnig hefur sjómönnum fækkað frá seinni hluta síðustu aldar. Undanfarin ár hefur vitund um mikilvægi fræðslu til sjómanna og slysavarna eflst en það er ekki síst breytt hugarfar sjófarenda sem ber að þakka þessa ánægjulegu þróun.