sunnudagur, 23. september 2018
 
TölublöðVenjuleg útgáfa

Baráttufundur í Vestmannaeyjum: Stjórnvöld falli þegar í stað frá áformum um fyrningarleið

22. janúar 2010 kl. 09:57

„Almennur baráttufundur íbúa í Vestmannaeyjum, 21. janúar 2010, krefst þess að stjórnvöld falli þegar í stað frá áformum um svokallaða  fyrningarleið í sjávarútvegi, enda er hún í eðli sínu aðför að starfsgrundvelli fyrirtækja í sjávarútvegi og þar með að lífskjörum og atvinnuöryggi fólks sem í atvinnugreininni starfar," segir m.a. í ályktun sem samþykkt var á 350 manna fundi í Eyjum í gærkvöld, að því er fram kemur á vef Landssambands útvegsmanna.

Fundurinn krefst þess jafnframt að fallið verði frá útflutningsálagi á ísfiski og afnámi sjómannaafsláttar, enda er með slíkum ráðstöfunum verið að skerða kjör þeirra sem málið varðar umfram það sem landsmenn verða að þola nú um stundir vegna efnahagssamdráttar í samfélaginu.

Í ályktuninni segir ennfremur: ,,Boðað var til baráttufundarins undir yfirskriftinni Fyrnum fyrningarleiðina! Fundarboðendur voru  meðal annars félög sjómanna, skipstjórnarmanna, útvegsmanna og vélstjóra, auk Vestmannaeyjabæjar. Þetta segir allt sem segja þarf um  sterka og víðtæka samstöðu Eyjamanna gegn áformum um fyrningarleiðina, þar með talið er svokallað skötuselsfrumvarp á Alþingi.

Íslenskt samfélag þarf  síst á því að halda nú að höggvið sé að rótum sjávarútvegsins, þeirrar atvinnugreinar sem öðrum fremur skapar þjóðinni gjaldeyristekjur, stöðugleika og atvinnu landið um kring.

Fiskveiðistjórnarkerfið er vissulega umdeilt og það er ekki fullkomið frekar en önnur mannanna verk. Það er hins vegar og verður sameiginlegt verkefni stjórnmálamanna, og þeirra sem hagsmuna eiga að gæta, að fjalla sameiginlega um hugsanlegar breytingar á kerfinu í stað þess að stjórnvöld birti einhliða stríðsyfirlýsingar í garð fólks og fyrirtækja í atvinnugreininni.

Núna þarf sjávarútvegurinn  fyrst og fremst á starfsfriði að halda til að unnt sé að efla hann og styrkja enn frekar þannig að hann standi örugglega undir því hlutverki sem honum er ætlað í þjóðarbúinu og við uppbyggingu samfélagsins eftir bankahrunið.“