mánudagur, 20. nóvember 2017
 
TölublöðVenjuleg útgáfa

Beðið eftir Íslandssíldinni

9. nóvember 2017 kl. 12:30

Athafnasvæði Síldarvinnslunnar í Neskaupstað (Guðlaugur Birgisson)

Betir og Börkur á síldveiðum fyrir vestan land - veiðar á norsk-íslensku síldinni að baki.

Lokið var við að landa um 1.100 tonnum af norsk íslenskri síld úr Berki NK í Neskaupstað í gær og er veiðum á slíkri síld þar með lokið hjá Síldarvinnsluskipunum. 

Þetta kemur fram í frétt á heimsíðu Síldarvinnslunnar. 

Þar er haft eftir Jóni Gunnari Sigurjónssyni, yfirverkstjóra í fiskiðjuveri Síldarvinnslunnar, að makríl- og síldarvertíðin þetta árið gekk vel bæði hvað varðar veiðar og vinnslu. 

„Vinnsla á makríl hófst hjá okkur seint í júlímánuði og vinnsla á norsk-íslensku síldinni lauk í gær. Það má segja að þessi vertíð hafi að öllu leyti gengið eins og best verður á kosið. Afköstin í fiskiðjuverinu eru upp undir sjö hundruð tonn af makríl á sólarhring en það tekur lengri tíma að frysta hann en bæði síld og loðnu. Þegar mest var umleikis í sumar voru um 30 manns á vakt í verinu en upp á síðkastið hafa verið um 20 manns á vakt. Nú bíðum við eftir Íslandssíldinni en Beitir hóf veiðar á henni fyrir vestan land í gær og Börkur er á leiðinni á miðin,“ segir Jón Gunnar í viðtalinu.