mánudagur, 17. desember 2018
 
TölublöðVenjuleg útgáfa

Börkur með 1.500 tonn og Beitir 1.900 tonn af loðnu

2. mars 2018 kl. 12:30

Fryst á Japansmarkað og hrognavinnsla að hefjast

Börkur NK kom í gær með 1.500 tonn af loðnu til Neskaupstaðar. Þegar hófst frysting úr honum og er fryst fyrir Japansmarkað. Gert er ráð fyrir að lokið verði við að vinna úr Berki í kvöld.

Beitir NK er á landleið til Neskaupstaðar með 1.900 tonn. Sturla Þórðarson, skipstjóri á Beiti, sagði að aflinn hefði fengist á tveimur dögum; fyrri daginn var kastað út af Alviðru og seinni daginn vestan við Portland.

„Við fengum 800 tonna kast í gær og hrognafyllingin í þeirri loðnu er meiri en í fyrri köstunum en þá var hún um 18%,“ sagði Sturla í samtali við heimasíðu Síldarvinnslunnar.

Fulltrúar japanskra kaupenda eru í Neskaupstað og ræddi tíðindamaður heimasíðunnar við þá í gær. Þeir voru mjög ánægðir með loðnuna sem verið var að frysta úr Berki og sögðu að hún uppfyllti ágætlega þær kröfur sem þeir gerðu til hráefnisins. Vonast er til að loðnufrystingu á Japan verði haldið áfram í Neskaupstað fram yfir helgi en síðan má gera ráð fyrir að hrognavinnsla hefjist.