miðvikudagur, 20. febrúar 2019
 
TölublöðVenjuleg útgáfa

Fita grálúðunnar gegn húðsjúkdómum

12. febrúar 2019 kl. 12:00

Grálúðan er afar feitur fiskur. Mynd/Jón Baldur Hlíðberg

Gamlar sögur fiskverkakvenna komu lækni á sporið.

Nú er nýhafið samstarfsverkefni milli íslenska fyrirtækisins Dermos og Matís þar sem ætlunin er meðal annars að kanna áhrif fituefna úr grálúðu til dæmis á húðsjúkdóma.

Á heimasíðu Matís segir frá því að þegar Guðbjörn Björnsson, meðeigandi Dermos, var héraðslæknir á Austfjörðum, fyrir allmörgum árum síðan, heyrði hann á tali manna að fiskverkakonur, löguðust mjög af psoriasis og exemi þegar þær unnu berhentar við grálúðu. Hann ákvað þá í samráði við lækni í húðsjúkdómafræði að búa til áburð úr fitu grálúðu.

Áburðurinn var prófaður á sjúklingum með þessa húðsjúkdóma og góður bati náðist en vegna mikillar fiski- og lýsislyktar hættu þeir prófunum. Meðhöndlun á fitusýrum hefur farið mikið fram síðan þessi tilraun var gerð.

Markmið verkefnisins er að útbúa áburð úr fituefnum grálúðu, takmarka lyktina sem áður var of mikil og búa til náttúrlegan áburð sem getur meðhöndlað sjúkdóminn með skilvirkari hætti en önnur efni á markaðinum.

Verkefnið er styrkt af Tækniþróunarsjóði og verkefnisstjórnun hjá Dermos.