fimmtudagur, 25. maí 2017
 
TölublöðVenjuleg útgáfa

Heldur farið að hægja á kolmunnaveiðinni

16. maí 2017 kl. 13:25

Beitir NK landar í Neskaupstað. (Mynd Hákon Ernuson)

Nokkurra daga vinnsluhlé hjá fiskimjölsverksmiðjum í Neskaupstað og á Seyðisfirði

Í gærkvöldi kom Beitir NK til Neskaupstaðar með 2.800 tonn af kolmunna og Hákon EA kom til Seyðisfjarðar með rúmlega 1.600 tonn. Nokkurra daga vinnsluhlé hafði verið hjá verksmiðjunum á báðum stöðum vegna skorts á hráefni, að því er fram kemur á vef Síldarvinnsluannar. 

Tómas Kárason, skipstjóri á Beiti, segir að nú sé farið að hægja heldur á veiðinni í færeysku lögsögunni. „Það er þó þannig að stundum reka menn í góð hol. Kolmunninn dreifir sér þegar hann kemur upp í kantana suður af Færeyjum og austan og vestan við eyjarnar og þá fer að hægjast á veiði,“ segir Tómas.

Beitir mun halda á ný til kolmunnaveiða að löndun lokinni.

Börkur NK er á landleið með 2.250 tonn af kolmunna og einnig Bjarni Ólafsson AK með 1.750 tonn. Börkur mun væntanlega landa á Seyðisfirði en Bjarni Ólafsson í Neskaupstað.