föstudagur, 19. janúar 2018
 
TölublöðVenjuleg útgáfa

Hjákátleg gagnrýni ESB á makrílveiðar Íslendinga

5. nóvember 2008 kl. 11:06

Friðrik J. Arngrímsson, framkvæmdastjóri LÍÚ, segir gagnrýni fulltrúa Evrópusambandsins á makrílveiðar Íslendinga í eigin lögsögu beinlínis hjákátlega.

Gagnrýnin kom fram á fundi strandríkja í London í síðustu viku, að því er fram kemur í Fiskaren/Fiskeribladet í Norgi.

Á fundinum var heildarmakrílkvótinn í NA-Atlantshafi á næsta ári ákveðinn 625.000 tonn.

„Evrópusambandið skikkar sjómenn sína til að henda fiski í sjóinn,“ segir Friðrik á heimasíðu LÍÚ. 

„Við veiddum 112 þúsund tonn af makríl í íslensku lögsögunni með þeim 130 þúsund tonnum sem við veiddum af síld. Ef við værum í ESB færi sambandið með stjórn veiða úr deilistofnum. Þá hefðum við staðið frammi fyrir því að sleppa því að veiða síldina – eða veiða hana og henda milljarðaverðmætum af makríl fyrir borð."

Áætla má að heildarverðmæti makrílaflans sé ríflega sex milljarðar króna.

Makrílkvóti næsta árs, sem ákveðinn var á fundinum í London, er 30% hærri en heimilt var að veiða á yfirstandandi ári.

Evrópusambandið fær 417.000 tonn í sinn hlut, Norðmenn 180.000 tonn og Færeyingar 28.000 tonn. Áætlaður makrílafli á þessu ári er um 600.000 tonn.

Ósk Íslands til margra ára um að fá að koma að samningaborðinu þegar makrílkvótanum er skipt hefur ávallt verið synjað.