sunnudagur, 24. mars 2019
 

Sextíu prósent smábáta aðstöðulausir

Faxaflóahafnir gerðu skoðanakönnun meðal smábátaeigenda og gefa til kynna vilja til efla smábátaútgerð og bæta hafnaraðstöðu.

Neita að afhenda Herjólf – vilja aukagreiðslur

Vegagerðin hefur hafnað kröfum skipasmíðastöðvarinnar Crist S.A. sem gerir kröfur um viðbótargreiðslu þvert á alla samninga um lokaskil verksins og aukaverk. Vegagerðin hefur leitað ráðlegginga erlendra sérfræðinga á þessu sviði varðandi viðbrögð.

Myndi aldrei rúma mikið af þorski

Landgrunnið við Ísland er allt að hundrað sinnum stærra en landgrunnið við Jan Mayen. Vistkerfi landgrunnsins við Jan Mayen myndi því aldrei rúma þorsk í neinu magni sem nálgast það sem íslenska landgrunnið ræður við.

Merkingar á þorski hafnar á ný

Nú herma fréttir að íslenskur þorskur sé farinn að veiðast við Jan Mayen. Því er nauðsynlegt að merkingar séu stundaðar reglulega þannig að hægt sé að fylgjast stöðugt með því hvort breytingar verði á fari þorsks við Ísland.

Jafn og góður afli frá áramótum

Síðustu tvö ár þurftum við að fara vestur á Selvogsbanka til að fá þorsk í mars- og aprílmánuði en nú er staðan allt önnur,“ segir Þórhallur Jónsson, skipstjóri.

Mikill vöxtur í fiskeldi

Framleidd voru 19 þúsund tonn í fiskeldi á Íslandi árið 2018 og hefur framleiðslan nær fjórfaldast á síðustu tíu árum. Þar af var framleiðslan í laxeldi um 13,5 þúsund tonn.


TölublöðVenjuleg útgáfa

Hrognavinnsla hafin í Helguvík

7. mars 2018 kl. 12:13

Vilhelm Þorsteinsson EA í Helguvík. MYND/Eggert Ólafur Einarsson

Hrognavinnsla hófst í verksmiðju Síldarvinnslunnar í Helguvík síðastliðna nótt þegar Vilhelm Þorsteinsson EA kom þangað með 1.500 tonn af loðnu.

Loðnan fékkst í Faxaflóa og út af Snæfellsnesi. Hrognin eru unnin í samvinnu við Saltver ehf. í Reykjanesbæ. Loðnan er kúttuð og hreinsuð í Helguvík en fryst í húsnæði Saltvers í Njarðvík. Síldarvinnslan skýrir frá þessu á vef sínum.

Síldarvinnslan vitnar í Eggert Ólaf Einarsson, verksmiðjustjóra í Helguvík, sem segir hrognavinnsluna fara rólega af stað að venju en í morgun hafi allt verið farið að snúast þokkalega.

Alls eru rúmlega 4.000 tonn af loðnu komin á land í Helguvík á vertíðinni að meðtöldum þeim afla sem nú er verið að landa úr Vilhelm Þorsteinssyni. Grænlenska loðnuskipið Polar Amaroq landaði þar 900 tonnum í gær.

Þá greinir Síldarvinnslan einnig frá því að Börkur NK sé á leið austur til Neskaupstaðar með 2.000 tonn af loðnu. Gert er ráð fyrir að hann komi til hafnar klukkan eitt í nótt og þá strax hefst hrognavinnsla hjá Síldarvinnslunni. 

Hjörvar Hjálmarsson skipstjóri greinir frá því þessi afli hafi fengist í sjö köstum á tveimur dögum: „Fyrri daginn vorum við á miðjum Faxaflóa en í gær vorum við um 10 mílur út af Snæfellsnesi. Út af nesinu var ein góð torfa sem megnið af flotanum var í og var hún nánast veidd upp.“

Hann segir víða loðnu að sjá en það sé eins og hún hafi lítið skilað sér inn á Faxaflóann. 

„Auðvitað er alltaf beðið eftir fréttum af vestangöngu. Undanfarin ár hefur komið góð gusa að vestan en þá hafa skipin oft verið búin með kvótann. Í loðnunni sem við erum með núna er hrognafyllingin á milli 26 og 27% og hrognaþroskinn 95-100%. Þetta ætti að henta vel í hrognavinnsluna,“ sagði Hjörvar samkvæmt frásögn Síldarvinnslunnar.