þriðjudagur, 14. ágúst 2018
 
TölublöðVenjuleg útgáfa

Loðnuvertíðin þróast sérkennilega

7. febrúar 2018 kl. 13:09

Landað úr Liafjord til manneldisvinnslu í Neskaupstað í morgun. Mynd/Smári Geirsson

Íslenski flotinn liggur í landi eða er farinn á kolmunnaveiðar - Norðmenn eru fjölskipa á loðnumiðunum.

Á heimasíðu Síldarvinnslunnar er fjallað um þá sérkennilegu stöðu að íslenski loðnuflotinn skuli vera bundinn við bryggju um þessar mundir að undanskildum fimm skipum sem hafa haldið til kolmunnaveiða í færeyskri lögsögu.

Á loðnumiðunum séu hins vegar einungis norsk skip sem melduðu inn 5.500 tonn síðastliðinn sólarhring.

„Norsku skipin eru mörg með 200-500 tonna afla og munu sex þeirra landa hjá Síldarvinnslunni í Neskaupstað, ýmist til manneldisvinnslu eða til mjöl- og lýsisframleiðslu. Í morgun var verið að landa úr Liafjord til manneldisvinnslu og var ráðgert að landað yrði úr Norderveg og Fiskskjer á eftir honum. Þá munu Strand Senior og Vea landa í fiskimjölsverksmiðjuna,“ segir í fréttinni.

Eins kemur fram að það sem af er loðnuvertíðinni hafa vinnsluskipin Hákon EA og Vilhelm Þorsteinsson EA landað tæplega 5.000 tonnum í frystigeymslur Síldarvinnslunnar. Þá hefur grænlenska skipað Polar Amaroq skipað fjórum förmum beint um borð í flutningaskip, tvisvar á Eskifirði og tvisvar í Neskaupstað. Polar Amaroq lá inni á Norðfjarðarflóa í morgun við frystingu.