mánudagur, 16. júlí 2018
 
TölublöðVenjuleg útgáfa

Minningarreitur helgaður látnum starfsmönnum

11. júlí 2018 kl. 13:35

Síldarverksmiðja Síldarvinnslunnar 17. júlí 1958, daginn sem var í fyrsta sinn tekið á móti hráefni til vinnslu. Mynd/Reynir Zoëga

Síldarvinnslan hyggst þriðjudaginn 17. júlí nk. að bjóða til stuttrar samkomu í Safnahúsinu í Neskaupstað. Á samkomunni verður gerð grein fyrir samkeppni um fyrirhugaðan minningarreit á grunni gömlu síldarverksmiðjunnar.

Frá því segir á heimasíðu Síldarvinnslunnar að fyrst var tekið á móti síld til vinnslu í síldarverksmiðju fyrirtækisins í Neskaupstað 17. júlí árið 1958. Framkvæmdum við verksmiðjuna var ekki að fullu lokið en engu að síður þótti tímabært að fá hráefni til vinnslu og láta reyna á tækjabúnað. Gullfaxi NK kom með fullfermi af síld þennan dag og var aflanum landað í verksmiðjuna. Ekkert fór á milli mála að hér væri um tímamót að ræða og fögnuðu Norðfirðingar því að nú væri Neskaupstaður orðinn alvöru síldarbær.

 Það segir ennfremur frá því að mitt í þeirri gleði sem ríkti vegna tilkomu síldarverksmiðjunnar bar alvarlegan skugga á þennan fyrsta dag sem hráefni var landað í verksmiðjuna: Alvarlegt slys varð í hráefnisþróm hennar þegar þróarveggur brast.

„Ungur og efnilegur maður, Þorsteinn Jónsson, lét lífið í þessu slysi og sorgin skyggði á gleðistundina. Því miður er þetta ekki eina banaslysið í sögu Síldarvinnslunnar. Alls hafa tólf manns látist við störf hjá fyrirtækinu, þar af sjö í snjóflóðunum hörmulegu 20. desember 1974,“ segir í umfjölluninni.

Síldarvinnslan hyggst þriðjudaginn 17. júlí nk. að bjóða til stuttrar samkomu í Safnahúsinu í Neskaupstað. Á samkomunni verður fjallað um upphaf starfsemi fyrirtækisins fyrir 60 árum og gerð grein fyrir samkeppni um fyrirhugaðan minningarreit á grunni gömlu síldarverksmiðjunnar. Mun reiturinn verða helgaður öllum þeim sem látið hafa lífið í starfi hjá Síldarvinnslunni. Gert er ráð fyrir að gamli gufuketillinn, sem enn stendur á grunninum, verði hluti af minningarreitnum. Aðstandendum þeirra sem farist hafa í starfi hjá fyrirtækinu er sérstaklega boðið á samkomuna en eins eru allir núverandi og fyrrverandi starfsmenn fyrirtækisins velkomnir, segir í fréttinni.