miðvikudagur, 20. júní 2018
 
TölublöðVenjuleg útgáfa

Mun minna unnið af bolfiski á Seyðisfirði

3. janúar 2018 kl. 16:44

Fiskvinnslustöðin á Seyðisfirði. Gullver NS við bryggju framan við stöðina. Mynd/Ómar Bogason

Aflinn sem kemur til vinnslu í fiskvinnslustöðinni á Seyðisfirði kemur frá togaranum Gullver NS og að hluta til frá Vestmannaeyjatogurunum Vestmannaey og Bergey.

Fiskvinnslustöð Síldarvinnslunnar á Seyðisfirði tók á móti 2.625 tonnum af bolfiski til vinnslu á nýliðnu ári, þar af var þorskur um 1.980 tonn og ufsi 491 tonn. Er þetta mun minna hráefni en unnið var á árinu 2016 en þá var tekið á móti um 3.500 tonnum.

Frá þessu segir á heimasíðu fyrirtækisins en ein helsta ástæða minnkandi vinnslu á milli ára er sjómannaverkfallið í upphafi árs.

Ómar Bogason, framleiðslustjóri fiskvinnslustöðvarinnar, segir í frétt fyrirtækisins að árið 2017 hafi verið þungt í bolfiskvinnslunni.

„Verkfallið í upphafi árs hafði sín áhrif og leiddi til þess að ekkert var unnið fyrstu tvo mánuði ársins. Hin sterka króna hafði neikvæð áhrif á afkomuna og eins lækkaði afurðaverð á okkar helstu mörkuðum, einkum varð verðlækkunin mikil á ufsaafurðum. Þá hefur launakostnaður aukist til muna. Á árinu lauk framkvæmdum við að klæða fiskvinnslustöðina að utan og nú er húsið orðið til fyrirmyndar sem okkur finnst afar jákvætt,“ segir Ómar.

Aflinn sem kemur til vinnslu í fiskvinnslustöðinni á Seyðisfirði kemur frá togaranum Gullver NS og að hluta til frá Vestmannaeyjatogurunum Vestmannaey og Bergey. Gullver fiskaði 4.350 tonn á árinu 2017 og er það mesti afli sem skipið hefur borið að landi á einu ári. Afli Gullvers var 300 tonnum meiri en á árinu 2016 en aflaverðmætið hins vegur 15 milljón krónum minna.