þriðjudagur, 25. september 2018
 
TölublöðVenjuleg útgáfa

Rólegt yfir makrílveiðum

7. júlí 2016 kl. 09:48

Víkingur AK. (Mynd: Kristján Maack)

Víkingur AK kom með 540 tonna afla til Vopnafjarðar í gær.

Rólegt hefur verið yfir makrílveiðunum að undanförnu en þó landaði Víkingur AK um hádegisbil í gær um 540 tonna afla á Vopnafirði. Þetta var afrakstur annarrar veiðiferðar skipsins á makrílveiðum við suðurströnd landsins. Að sögn Alberts Sveinssonar skipstjóra virðist makrílaflinn vera að glæðast, a.m.k. var aflinn nú meiri en í fyrstu veiðiferðinni.

,,Við byrjuðum við tólf mílurnar í Breiðamerkurdjúpinu en stutt prufuhol sýndi að hlutfall síldar í aflanum var of mikið. Við færðum okkur því utar með þeim árangri að síldin var ekki til vandræða,“ segir Albert í viðtali á vef HB Granda, en mikið er af síld við suðurströndina um þessar mundir. Hún heldur sig samt grynnra en makríllinn og virðist vera að grynnka meira á sér ef eitthvað er.

Að sögn Alberts er misjafnt hve togað er lengi hverju sinni.

,,Best er að fá 150 til 200 tonn á stuttum tíma og hífa þá en annars reynum við að toga ekki of lengi til þess að gæði fisksins séu sem mest. Í tregveiði getur það reynst erfitt og aðstæður geta verið misjafnar. Maður hefur lent í því að fá gott hol og svo ekki sporð í því næsta þótt allar forsendur ættu að vera fyrir hendi.“

Samkvæmt upplýsingum skipstjórans er makríllinn af ágætri stærð. Meðalstærðin í veiðiferðinni var 388 grömm og makríllinn fitnar mjög hratt enda nóg um æti. Albert segist búast við því að komast aftur á miðin annað kvöld en þar er fyrir Venus NS.

,,Sem betur fer þá hefur skipunum á makrílveiðum fjölgað síðustu dagana og það auðveldar okkur leitina,“ segir Albert Sveinsson.