laugardagur, 17. nóvember 2018
 
TölublöðVenjuleg útgáfa

Segja áróður og þvinganir ráða afstöðu landsliðsins

7. september 2018 kl. 17:00

Mynd/Arnarlax

Arnarlax segir Kokkalandsliðið hafa látið undan þrýstingi áróðurshóps tiltekinna sérhagsmuna og tekur afstöðu gegn íslenskum matvælum; eldislaxi.

Fiskeldisfyrirtækið Arnarlax hefur brugðist við þeirri ákvörðun Klúbbs matreiðslumanna að rifta nýundirskrifuðum styrktarsamningi þeirra á milli.

Tilkynning fyrirtækisins fer hér á eftir óbreytt:

Við erum hugsi yfir þeim óvæntu atburðum og umræðu sem hefur átt sér stað í kjölfar samkomulags Arnarlax og Klúbbs matreiðslumanna um að hið vestfirska fiskeldi Arnarlax verði bakhjarl Kokkalandsliðsins.

Samningurinn var undirritaður í góðri trú og við hátíðlega athöfn í Hörpu á miðvikudaginn að viðstöddu fjölmenni þar á meðal liðsmönnum Kokkalandsliðsins. Verkefnið er spennandi og hefur verið í undirbúningi í tvo mánuði.

Okkur finnst ákaflega leitt að unga landsliðsfólkið okkar hafi verið dregið inn í grímulausa hagsmunabaráttu með þvingunum veiðileyfahafa og hatursfullum áróðri þeirra gegn uppbyggingu sjókvíeldi hér á landi að farsælli fyrirmynd nágrannalanda okkar. Hjá Arnarlaxi starfa um 200 manns, starfsmenn og verktakar. Fyrirtækið er rekið af ábyrgð og með virðingu fyrir umhverfi og samfélagslegum gildum og árið 2017 var skattspor Arnarlax á sunnanverðum Vestfjörðum tæpar 700 milljónir króna.

Leyfi Arnarlax til laxeldis eru gefin út í samræmi við stjórnarsáttmálann og stefnu yfirvalda er lýtur umsjón opinberra stofnanna eins og Umhverfisstofnunar, Matvælastofnunar og er uppbyggingin á höndum færustu vísindamanna okkar hjá Hafrannsóknarstofnun. Áhugavert væri að til samanburðar og til að gæta jafnræðis að skoða skattspor veiðileyfahafa af rekstri laxveiðiáa, veitinga- og gistiþjónustu og þjónustu leiðsögumanna í veiðinni.

Nú er kominn upp sú einkennilega staða að Kokkalandsliðið hefur látið undan þrýstingi áróðurshóps tiltekinna sérhagsmuna og tekur afstöðu gegn íslenskum matvælum, eldislaxi.

Arnarlaxi hefur borist skeyti þar sem stjórn Klúbbs mat­reiðslu­meist­ara riftir samningnum á forsendum sem við teljum að standist ekki skoðun og höfum óskað eftir viðræðum við þá eftir helgi um farsæla lausn málsins svo tryggja megi atvinnuöryggi landsliðsins. Við munum auk þess eiga fundi með öðrum bakhjörlum landsliðsins um siðferði þess að landslið taki afstöðu byggða á grímulausum áróðri og efnahagsþvingunum gegn einstökum fyrirtækjum og vörum þess.

Við óskum því unga og efnilega fólki sem kemur að Kokkalandsliðinu alls hins besta og góðu gengi á heimsmeistaramótinu í Lúxemborg í lok nóvember.