laugardagur, 17. nóvember 2018
 
TölublöðVenjuleg útgáfa

Skip Síldarvinnslunnar hafa lokið veiðum á norsk-íslenskri síld

2. nóvember 2018 kl. 10:49

Börkur NK að landa í Neskaupstað. Ljósm. Smári Geirsson

Snúa sér íslenskri sumargotssíld en veiðar eru nýhafnar fyrir vestan land.

Börkur NK er á landleið úr Smugunni með 1.225 tonn af síld og þar með er veiðum á norsk-íslensku síldinni lokið hjá skipum Síldarvinnslunnar í ár.

Frá þessu segir á vef Síldarvinnslunnar.

Gert er ráð fyrir að Börkur komi til Neskaupstaðar um hádegisbil á morgun.

 

Beitir NK kom til Neskaupstaðar með 1.620 tonn af síld í fyrrinótt. Tómas Kárason skipstjóri segir í viðtali í frétt Síldarvinnslunnar að síldin hafi fengist austarlega í Smugunni. „Við fengum aflann í fimm holum, 320 tonn að jafnaði í holi. Stærsta holið var 500 tonn. Það var togað í stuttan tíma eða frá 1 klukkustund og upp í þrjár og hálfa. Veiðiferðin einkenndist af fínni veiði, góðu veðri og það var mikið af síld að sjá,“ segir Tómas.

 

„Nú munu bæði Börkur og Beitir snúa sér að veiðum á íslenskri sumargotssíld en Bjarni Ólafsson AK er þegar kominn vestur og bíður þar hagstæðs veðurs,“ segir í niðurlagi fréttarinnar.