fimmtudagur, 19. júlí 2018
 
TölublöðVenjuleg útgáfa

TF-GNÁ komin með nætursjónauka

14. janúar 2009 kl. 16:48

Tvær þyrlur Gæslunnar nú með nætursjónaukabúnað

Nýlega var lokið við að setja nætursjónauka í TF-GNÁ þyrlu Landhelgisgæslunnar og var hún tekin í notkun nú í vikunni.

Þetta kemur frá vef Landhelgisgæslunnar.

Þar kemur fram að unnið hefur verið að ísetningunni undanfarið eitt og hálft ár en það er umfangsmikið verkefni en til þess að gera notkun þeirra mögulega þarf að vera sérstök lýsing í þyrlunni sjálfri.

Nætursjónaukar hafa þann eiginleika að magna margfalt upp alla birtu. Þegar horft er í gegn um þá í myrkri er það svipað og sjá í dagsbirtu. Sjá má minnstu ljóstýru langar leiðir. Þetta gerir þyrluáhöfnum kleift að fljúga við aðstæður sem annars væru óhugsandi.

Þyrlukostur LHG samanstendur nú af tveimur stórum þyrlum af gerðinni Super Puma, TF-LIF og TF-GNA sem báðar eru með nætursjónaukabúnað.

Landhelgisgæslan segir uppsetningu nætursjónaukanna vera stórt stökk og auka afkasta- og björgunargetu Flugdeildarinnar til muna.