fimmtudagur, 26. apríl 2018
 
TölublöðVenjuleg útgáfa

Verðmæti grásleppuhrogna og kavíars eykst um 113% milli ára

31. ágúst 2009 kl. 10:07

Á fyrri helmingi ársins nam útflutningsverðmæti saltaðra grásleppuhrogna og grásleppukavíars 923 milljónum króna.  Það er hvorki meira né minna en 113% aukning frá sama tíma í fyrra.  Þetta kemur fram á vef Landssambands smábátaeigenda.

Eins og undanfarin ár keyptu Frakkar langmest af grásleppukavíar eða tæpan helming af heildarmagninu, Þjóðverjar voru næstir í röðinni og Ítalir í þriðja sæti í heildarmagni innkaupa.   Alls voru flutt út 226 tonn á tímabilinu.

Hæsta meðalverð fyrir grásleppukavíar fékkst á Bandaríkjamarkaði.  Heildarútflutningsverðmæt kavíars var 355 milljónir.  Svíar og Danir keyptu mest af söltuðum grásleppuhrognum og Þjóðverjar voru skammt á eftir.  Alls svaraði heildarmagnið til 4.658 tunna á móti 4.117 tunna á sama tímabili 2008.

 Í fréttinni á vef LS segir að þessar fréttir séu sérlega ánægjulegar fyrir það að þrátt fyrir að veik króna hafi hjálpað til við að stuðla að verðmætaaukningu hafi einnig náðst hækkun á báðum vörunum í evrum og dollar.