fimmtudagur, 24. janúar 2019
 
TölublöðVenjuleg útgáfa

Vestfirsku laxeldisfyrirtækin fá ASC-vottun

8. janúar 2019 kl. 13:40

Laxeldi í Arnarfirði. MYND/HAG

Bæði Arnarlax og Arctic Sea Farm hafa fengið sjálfbærnivottun fyrir afurðir sínar.

„Við erum mjög ánægð með að vera komin með ASC umhverfisvottun. Þetta undirstrikar markmið okkar um að stunda fiskeldi á sjálfbæran hátt í sátt við náttúru og samfélag,“ segir Kristian Mattiasson framkvæmdarstjóri Arnarlax í tilkynningu frá fyrirtækinu.

Þar segir frá því að vestfirsku laxeldisfyrirtækin Arnarlax og Arctic Sea Farm hafi fengið ASC umhverfisvottun á framleiðslu sína.

„ASC vottunin hefur mikla þýðingu fyrir okkur þar sem okkar viðskiptavinir horfa töluvert til umhverfisáhrifa og gera kröfur í þeim efnum. Við teljum að þessi áhersla á umhverfismál skili okkur ákveðnu samkeppnisforskoti til lengri tíma“ er haft eftir Stein Ove Tveiten, framkvæmdastjóra Arctic Sea Farm, í tilkynningunni.

„Allur lax sem framleiddur verður á Vestfjörðum á árinu 2019 verður vottaður,“ segir í tilkynningunni frá Arnarlaxi. Vottunin nær þó aðeins til framleiðslu fyrirtækisins á Steinanesi við Haganes og Steinanes. Þá gildir vottunin hjá Arctic Fish aðeins til 9. maí næstkomandi.

Síðasta sumar var greint frá því að Arnarlax fengi ekki að svo stöddu ASC-vottun á framleiðslu sína í Laugardal, eins og fyrirtækið hafði gert sér vonir um. Samkvæmt upplýsingum frá Arnarlaxi var öllum eldislaxi í Laugardal slátrað síðasta sumar. Laxeldi hefst þar síðan að níu í júní á þessu ári og stefnir fyrirtækið að því að fá vottun þar árið 2020.

ASC (Aquaculture Stewardship Counsel) er ein strangasta umhverfisvottun þegar kemur að fiskeldi og þekkt um allan heim, hliðstæð MSC-vottun fyrir fiskveiðar. ASC vottunarstaðallinn hefur verið þróaður meðal annars af World Wildlife Fund (WWF) og fiskeldisfyrirrækjum en til að fá vottun þurfa fyrirtækin meðal annars að lágmarka umhverfisáhrif, starfa í sátt við samfélag og umhverfi.

ASC vottun er hliðstæð MSC staðlinum sem er þekktasti umhverfisstaðallinn fyrir sjávarafurðir nema þessi staðall er aðlagaður eldisafurðum. ASC samtökin sem að baki staðlinum starfa eru ekki rekin í hagnaðarskini (non-profit) og óháð samtök.

Fyrirtæki sem standast ASC vottun skuldbinda sig að lágmarka áhrif á umhverfið á ýmsa vegu. Taka þarf tillit til villtra laxfiskastofna, fugla, sjávarspendýra og annara lífvera sem búa í námunda við eldissvæðin svo eitthvað sé nefnt.

Það var Svissneska vottunarfyrirtækið Bio Inspecta sem sá um ASC úttekt Arnarlax. „Það er ánægjulegt að búið sé að taka út eldissvæði Arnarlax við Haganes og Steinanes og að fiskur af þessum eldissvæðum sé vottaður. Núna getur Arnarlax boðið viðskiptavinum upp á lax  sem er alin á sjálfbæran og skynsamlegan hátt“ segir Roger Benz, gæðastjóri Bio Inspecta