laugardagur, 21. september 2019
 
TölublöðVenjuleg útgáfa

Allsherjarþing SÞ lofar sjávarútvegsháskólann á Íslandi

13. desember 2013 kl. 09:43

Útskriftarnemar Sjávarútvegsskóla Háskóla Sameinuðu þjóðanna. (Mynd af vef Hafró).

280 nemendur frá 47 löndum hafa útskrifast frá skólanum.

Á fundi allsherjarþings Sameinuðu Þjóðanna í New York 9. desember 2013, var samþykkt regluleg ályktun um sjálfbærar fiskveiðar (fiskveiðiályktun allsherjarþingsins). Í ályktuninni, sem er ávöxtur samningaviðræðna milli ríkja á vettvangi Sameinuðu þjóðanna, var að þessu sinni viðurkennt sérstaklega framlag Sjávarútvegsskóla Háskóla Sameinuðu þjóðanna á Íslandi við að byggja upp sjávarútveg í þróunarríkjum.

Í ályktuninni segir að allsherjarþingið meti mikils 15 ára starf skólans við að byggja upp þekkingu, færni og verkkunnáttu í þróunarríkjunum, en alls  hafi 280 nemendur frá 47 löndum útskrifast frá skólanum. Að auki hafi skólinn staðið fyrir 36 styttri námskeiðum í 12 löndum.

Á vef atvinnuvega- og nýsköpunarráðuneytisins er því fagnað því að starf Sjávarútvegsskóla Háskóla Sameinuðu þjóðanna sé viðurkennt með þessum hætti - og skólanum óskað til hamingju.