mánudagur, 22. júlí 2019
 
TölublöðVenjuleg útgáfa

Allt að 80 tonn í gegnum vinnsluna á sólarhring

10. júlí 2019 kl. 11:10

Vigri RE

Vigri RE kom til heimahafnar um helgina eftir mjög góða veiðiferð í rússnesku lögsöguna í Barentshafi.

Frystitogari HB Granda - Vigri RE - kom til hafnar í Reykjavík síðastliðið sunnudagskvöld eftir mjög góða veiðiferð í rússnesku lögsöguna í Barentshafi. Aflinn upp úr sjó eftir 23 daga á veiðum var 1.210 tonn eða tæp 53 tonn að jafnaði á sólarhring.

„Ég held að þetta sé mettúr hjá okkur á Vigra. Vinnslan var nánast á fullu hjá okkur þá daga sem við vorum að veiðum og þegar best lét afkastaði hún 70 til 80 tonnum á sólarhring,“ segir Árni Gunnólfsson skipstjóri í viðtali við heimasíðu fyrirtækisins en hann hefur mikla reynslu af veiðum í hvort tveggja norskri og rússneskri lögsögu í Barentshafi.

„Þetta er fimmtánda árið mitt í Barentshafi og aflabrögðin nú eru með þeim bestu sem ég man eftir. Það þykir gott að komast yfir þúsund tonnin í túrnum og ekki síst á jafn fáum veiðidögum og raun ber vitni. Við vorum mest að veiðum á svokölluðum Gilden-banka, norður af Múrmansk, en þar voru öll íslensku skipin að veiðum. Samvinnan var til fyrirmyndar og skýrir árangurinn að einhverju leyti.“

Aukaafli með þorskinum er alltaf einhver en ýsa er eina tegundin sem er kvótasett í rússnesku lögsögunni, auk þorsksins.

„Það er alltaf töluvert um skrápflúru og tindabikkju og að þessu sinni vorum við einnig með 45 til 50 tonn af ufsa sem aukaafla. Fiskurinn er vel haldinn og þorskurinn var feitur og stór. Það var blíðuveður á miðunum allan tímann en við hrepptum mótvind á leiðinni frá Íslandi auk þess sem straumar voru okkur óhagstæðir. Við vorum því sex daga á leiðinni á miðin og fimm daga heim, þannig að það fóru 11 sólarhringar í siglingar fram og til baka,“ segir Árni.