sunnudagur, 13. júní 2021
 
TölublöðVenjuleg útgáfa

Annatími í Slippnum Akureyri

10. júní 2021 kl. 10:20

Slippurinn Akureyri.

Mörg uppsjávarveiðiskip þurfa viðhald áður en makrílveiðar hefjast.

Slippurinn Akureyri hefur tekið á móti og þjónustað mörg skip að undanförnu og snemma í síðasta mánuði voru sjö skip af öllum stærðum og gerðum samtímis hjá Slippnum.

Á heimasíðu fyrirtækisins segir frá því að uppsjávarskipið Jóna Eðvalds SF frá Hornafirði var í slipp í tæpar þrjár vikur þar sem skipið var heilmálað, hliðarskrúfa tekin upp, skipið öxuldregið og viðgerðir framkvæmdar á stýrisbúnaði.

Annatíminn skýrist af því að uppsjávarskip þurfa viðhald eftir loðnuvertíð og í mörgum tilvikum nokkurra vikna kolmunnaúthald. Vikurnar fram að makrílvertíð eru því nýttar til viðhalds og endurbóta.

„Þessi tími er því oft fjörlegur hér í Slippnum og nauðsynlegt að nýta tímann til hins ítrasta. Í kjölfar Jónu Eðvalds komu svo Sigurður VE auk Bjarna Ólafssonar AK og er nú verið að vinna í báðum þessum skipum. Í kjölfar sjómannadagsins fara uppsjávarskipin svo að streyma eitt af öðru til makrílveiða,“ segir í fréttinni.

Plötuskipti og heilmálning fóru fram á dýpkunarskipinu Pétri mikla og gröfuprammanum Reyni sem eru í eigu Björgunar ehf. Viðgerðir voru unnar á skrúfu og stýrisbúnaði á Nøtte sem er þjónustubátur Laxa ehf.

Frystiskipið Sólberg ÓF, sem er í eigu Ramma, var botnmálaður sem og síður skipsins og frystilest. Breytingar voru gerðar á stýrisbúnaði ásamt öðrum minni viðhaldsverkefnum.

Ragnar Aðalsteinsson, útgerðarstjóri Ramma, segir það óneitanlega kost að geta tekið stórt skip á þurrt nálægt heimabyggð og fengið alla almenna þjónustu.

„Þær breytingar sem voru gerðar tókust vel og kláraði Slippurinn verkið á tilsettum tíma sem var okkur mjög mikilvægt“.

Erlendu frystiskipin Polonus og Angunnguaq II hafa verið hjá Slippnum Akureyri í töluverðan tíma og er áætlað að þau haldi til veiða á næstu vikum.

Það má því segja að líflegt sé á athafnasvæði Slippsins og er fyrirliggjandi að það haldi áfram á komandi mánuðum.