mánudagur, 30. nóvember 2020
 
TölublöðVenjuleg útgáfa

Árni Friðriksson í uppsjávarleiðangri sumarsins

4. júlí 2019 kl. 13:54

Árlegur sumaruppsjávarleiðangur Hafrannsóknastofnunar í Norðurhöfum er hafinn. Íslendingar taka þátt ásamt skipum frá Noregi, Færeyjum, Grænlandi og Danmörku

Rannsóknaskipið Árni Friðriksson er farið úr höfn til þátttöku í árlegum fjölþjóðlegum uppsjávarvistkerfisleiðangri í Norðurhöfum að sumarlagi (IESSNS, International Ecosystem Summer Survey in the Nordic Seas). Hafrannsóknastofnun greinir frá.

Þetta er tíunda árið í röð sem Hafrannsóknastofnun tekur þátt í hinum árlega uppsjávarvistkerfisleiðangri í Norðurhöfum að sumarlagi. Eins og í fyrra mun leiðangursfólkið halda úti bloggi þar sem hægt verður að fylgjast með því sem fram fer um borð í rannsóknaskipi. Bloggið er á slóðinni: pelagicecosystemsurvey.wordpress.com. Um borð eru sjö vísindamenn og 17 manna áhöfn. Einnig verður nú í fyrsta skipti hægt að fylgjast með staðsetningu og skoða feril flestra skipanna á slóðinni skip.hafro.is

Í leiðangrinum verður aflað gagna sem nýtast við fjölbreyttar rannsóknir sem snúa að vistkerfisþáttum frá frumframleiðni sjávar til útbreiðslu hvala. Gögnum er safnað fyrir 21 mismunandi rannsóknaverkefni, þar af fjögur ný. 

Meðal nýju verkefnanna eru fitumælingar á makríl og söfnun á erfðaefni úr íslenskri sumargotssíld. 

Leiðangurinn stendur í þrjátíu daga og verða sigldar um 5900 sjómílur eða tæplega 11 þúsund kílómetrar.