miðvikudagur, 13. nóvember 2019
 
TölublöðVenjuleg útgáfa

Engar loðnuveiðar ráðlagðar á vertíðinni

30. október 2019 kl. 13:50

Útbreiðsla loðnu í september - október 2019. MYND/Hafró

Í haustleiðangri Hafrannsóknastofnunar fannst nánast engin loðna innan íslenskrar lögsögu. Hún var öll við Grænland.

Hafrannsóknastofnun hefur birt niðurstöður úr bergmálsleiðangri á stærð loðnustofnsins og leggur til að engar loðnuveiðar verði leyfðar fiskveiðiárið 2019/2020. Ráðgjöfin verði endurmetin að loknum mælingum á stærð veiðistofnsins í byrjun næsta árs.

„Lítið fannst af fullorðinni loðnu innan íslenskrar lögsögu og var útbreiðsla loðnunar vestlæg, líkt og verið hefur undanfarin ár,“ segir í ráðgjöf stofnunarinnar. „Þó var minna um loðnu norðanvert á rannsóknasvæðinu en verið hefur undanfarin ár og ekkert fannst norðan við 71°30.“

Ennfremur segir: „Heildarmagn loðnu mældist 795 þúsund tonn og þar af var metin stærð veiðistofns vertíðarinnar 2019/2020 einungis um 186 þúsund tonn. Töluvert var hinsvegar um ungloðnu og mældust tæplega 83 milljarðar eða 608 þúsund tonn af ókynþroska loðnu en samkvæmt aflareglu þarf yfir 50 milljarða til að mælt verði með upphafsaflamarki fiskveiðiársins 2020/2021.  Gögn um niðurstöður ungloðnumælinganna verða lögð fyrir Alþjóðahafrannsóknaráðið (ICES) sem mun veita ráð um upphafsaflamark vertíðarinnar 2020/2021 þann 29. nóvember.“

Bergmálsmælingarnar fóru fram dagana 9. september til 21. október og voru gerðar á rannsóknarskipinu Árna Friðrikissyni og norska uppsjávarskipinu Erosi.

„Gildandi aflaregla byggir á því að skilja eftir 150 þúsund tonn til hrygningar í mars 2020 með 95% líkum. Tekur aflareglan tillit til óvissumats útreikninganna, vaxtar og náttúrulegrar dánartölu loðnu, auk afrán þorsks, ýsu og ufsa á loðnu. Í samræmi við ofangreinda aflareglu ráðleggur Hafrannsóknastofnun að ekki verði leyfðar loðnuveiðar á vertíðinni 2019/2020.“

Stofnunin mun að vanda mæla veiðistofn loðnu í janúar/febrúar 2020 og endurskoða ráðgjöfina í ljósi þeirra mælinga.