þriðjudagur, 18. júní 2019
 
TölublöðVenjuleg útgáfa

Engey RE komin úr góðri veiðiferð

9. apríl 2019 kl. 13:00

Engey RE. MYND/HB Grandi

Friðleifur Einarsson skipstjóri segir töluvert magn vera af fiski á suðvestursvæðinu, en mikil hreyfing samt á fisknum.

„Þetta var fínn túr, góð veði og veðrið var með besta móti miðað við árstíma. Við vorum um þrjá og hálfan sólarhring á veiðum og aflinn var um 180 til 190 tonn, miðað við slægt,“ segir Friðleifur Einarsson, skipstjóri á Engey RE, skipi HB Granda.

Rætt er við Friðleif á vef HB Granda, en skipið kom mun fyrr til hafnar en áætlað var vegna hinna góðu aflabragða.

„Við hófum veiðar á Fjöllunum. Fengum þar gullkarfa og svo hittum við á ufsa og náðum að veiða það sem vinnslan hafði skammtað okkur,“ segir Friðleifur sem næst segist hafa reynt fyrir sér á Eldeyjargrunni.

,,Aflinn var aðallega þorskur og svo fengum við gullkarfa með. Við enduðum svo veiðar á Selvogsbankanum en þar var aflinn aðallega þorskur og ýsa.“

Að sögn Friðleifs virðist vera töluvert magn af fiski á suðvestursvæðinu.

„Það er hins vegar mikil hreyfing á þessum fiski og því ekki á vísan að róa. Það á ekki síst við um ufsann. Maður gengur aldrei að honum vísum. Stundum verður maður sama og ekkert var við ufsa á slóðinni en aðra daga hittir maður á ufsann og þá getur stundum verið mokveiði,“ segir Friðleifur í frásögn HB Granda.