miðvikudagur, 1. apríl 2020
 
TölublöðVenjuleg útgáfa

Erlend skip þurfa sérstaka heimild til að koma til hafnar

6. mars 2020 kl. 19:17

Celebrity Eclipse

Sérstakrar heilbrigðisyfirlýsingar skipa krafist vegna COVID-19.

Öll skip sem koma til landsins erlendis frá þurfa nú að veita Landhelgisgæslunni sérstaka heilbrigðisyfirlýsingu vegna COVID-19 áður en þau fá heimild til að koma til hafnar. Undir venjulegum kringumstæðum ber skipum að senda Landhelgisgæslunni almenna heilbrigðisyfirlýsingu sem og aðrar upplýsingar.

Þetta kemur fram í tilkynningu frá Landhelgisgæslunni. Þar segir jafnframt:

Vegna aðstæðna nú ber skipstjórum og skipslæknum, ef þeir eru um borð, að fylla út sérstakt eyðublað sem getur gefið upplýsingar um COVID-19 smit. Skipum verður ekki hleypt til hafnar nema eyðublaðið berist Landhelgisgæslunni. Vakni grunur um sýkingu af völdum COVID-19 um borð í skipi, tilkynnir Landhelgisgæslan málið til sóttvarnalæknis. Í slíkum tilfellum hafa sóttvarnalæknir, lögregla, Landhelgisgæslan, tollgæsla, hafnaryfirvöld hluteigandi hafnar, Samgöngustofa og skipstjóri samráð sín á milli um að hleypa farþegum ekki frá borði auk þess sem skipinu verður ekki heimilt að koma að bryggju á meðan greining fer fram.  

Það er svo í höndum sóttvarnalæknis að taka ákvörðun um næstu skref í samráði við aðra viðbragðsaðila.

Fyrsta skemmtiferðaskip ársins er væntanlegt til Reykjavíkur á mánudag.  Landhelgisgæslan telur ríka ástæðu til að herða eftirlit með skipakomum til landsins á næstunni í samráði við sóttvarnalækni, Samgöngustofu, hafnaryfirvöld og aðra viðbragðsaðila.