mánudagur, 30. nóvember 2020
 
TölublöðVenjuleg útgáfa

Fjárfesting í sjávarútvegi hrapar úr 8% í 2%

25. ágúst 2011 kl. 11:00

Frá togveiðum.

Skýringin er viðvarandi óvissa um fiskveiðistjórnunina, segir framkvæmdastjóri Vinnslustöðvarinnar.

,,Á árunum 2002–2008 nam fjárfesting í skipum, vélum og búnaði, ásamt fasteignum, tæplega 8% af tekjum að meðaltali en sveiflaðist nokkuð frá ári til árs, eins og eðlilegt er. Svo kemur árið 2009 og þá hrynur fjárfestingin niður í um 2% af tekjum! Árið 2010 er litlu skárra.”

Svo segir í grein sem Sigurgeir Brynjar Kristgeirsson framkvæmdastjóri Vinnslustöðvarinnar ritar í Fiskifréttir í dag. Útreikninginn byggir hann á  upplýsingum úr gagnagrunni ársreikninga fyrirtækja sem ráða yfir 70-80% aflaheimilda við Ísland. Hann segir úrtakið nægilega stórt til að lýsa sjávarútveginum í heild sinni.

Og Sigurgeir Brynjar heldur áfram: ,,Nú kann einhver að spyrja sem svo: Eru þetta tíðindi?  Eru sjávarútvegsfyrirtækin einfaldlega ekki svo skuldug að þau geta ekki fjárfest?  Svörin við slíkum spurningum er líka að finna í gagnagrunninum. Þar er fyrst til að taka að hlutfall heildarskulda á móti veltufé frá rekstri (það sem eftir er þegar allur rekstrarkostnaður og vextir hafa verið greiddir og fyrirtækin geta ráðstafað til endurnýjunarfjárfestingar, greiðslu afborgana, arðs til eigenda og nýfjárfestinga, svo sem markaðsstarfs) fyrir árin 2009 og 2010 er um eða undir  meðaltali áranna 2002-2008. Ekki er því skýringa á fjárfestingarfrostinu að leita þar.

 Skýringanna hlýtur hins vegar að vera að leit í viðvarandi óvissu um fiskveiðistjórnunina og þar af leiðandi í óvissu um rekstrargrundvöll sjávarútvegsfyrirtækjanna. Áhrifin af þessari ótíð af mannavöldum eru þannig mun meiri og alvarlegri en margir hafa ímyndað sér eða vilja trúa,” segir framkvæmdastjóri Vinnslustöðvarinnar.

Sjá nánar í Fiskifréttum.