mánudagur, 16. desember 2019
 
TölublöðVenjuleg útgáfa

Fyrsti kolmunnafarmurinn til Neskaupstaðar

27. nóvember 2019 kl. 10:56

Bjarni Ólafsson AK. Mynd Smári Gestsson.

Bjarni Ólafs landaði 1.800 tonnum eftir túr í blíðuveðri.

Fyrsti kolmunnafarmurinn á þessum vetri barst til Neskaupstaðar í morgun en þá kom Bjarni Ólafsson AK með 1.800 tonn.

Frá þessu er greint á vef Síldarvinnslunnar.

Gísli Runólfsson skipstjóri segir þar að þeir á Bjarna Ólafssyni hafi komið með fyrsta vetrarfarminn í fyrra um sama leyti.

„Við héldum til veiða 16. nóvember og til að byrja með fór mikill tími í að leita. Í fyrstu var aflinn tregur. Við vorum að draga í 20 tíma og fengum gjarnan innan við 200 tonn í holi og allt niður í 60 tonn. Síðan fór þetta að ganga betur og í lokaholinu fengum við 300 tonn eftir að hafa dregið í sjö og hálfan tíma. Þarna var veiðin að byrja af einhverju viti. Við fengum aflann norðaustur af Færeyjum og það var samfelld blíða allan túrinn. Þetta var eins og á besta sumardegi,“ segir Gísli.

Jafnframt segir í fréttinni að auk kolmunnans hefur íslensk sumargotssíld borist til Neskaupstaðar að undanförnu. Margrét EA landaði um 1.000 tonnum í gær og Börkur NK er að landa 1.300 tonnum.