þriðjudagur, 7. júlí 2020
 
TölublöðVenjuleg útgáfa

Heimild til flutnings milli fiskveiðiára úr 15% í 25%

19. maí 2020 kl. 12:30

Hvað er í pokanum. (Mynd: Þorgeir Baldursson)

Gert til að bregðast við áhrifum COVID-19 á íslenskan sjávarútveg

Kristján Þór Júlíusson, sjávarútvegs- og landbúnaðarráðherra, hefur undirritað reglugerð þar sem heimild til flutnings aflamarks í botnfisktegundum yfir á næsta fiskveiðiár er aukin tímabundið úr 15% í 25%. Er þetta gert til að stuðla að meiri sveigjanleika við veiðar og vinnslu til að bregðast við áhrifum COVID-19 á íslenskan sjávarútveg.

Þetta kemur fram í tilkynningu frá ráðuneytinu.

Samkvæmt gögnum Fiskistofu var hlutfall landaðs botnfiskafla 65% hinn 15. maí sl. en var tæp 70% á sama tíma í fyrra. Mikill samdráttur í eftirspurn eftir ferskfiski í heiminum í kjölfar COVID-19 er helsta ástæða þessarar lækkunar en einnig hefur dregið úr eftirspurn fyrir frosnum afurðum á síðustu vikum. Við þær aðstæður var talið rétt að veita tækifæri til frekari sveigjanleika við veiðar og vinnslu með því að hækka heimild til flutnings úr 15% í 25%.