mánudagur, 21. júní 2021
 
TölublöðVenjuleg útgáfa

HG hlýtur forvarnarverðlaun TM

15. febrúar 2013 kl. 15:07

Einar Valur Kristjánsson, framkvæmdastjóri Hraðfrystihússins Gunnvarar í Hnífsdal (t.v.) og Sigurður Viðarsson, forstjóri Tryggingamiðstöðvarinnar

Þykir skara fram úr á sviði forvarna gegn óhöppum og slysum.

 

Hraðfrystihúsið Gunnvör í Hnífsdal hlaut forvarnarverðlaun Tryggingamiðstöðvarinnar fyrir árið 2012. Tryggingamiðstöðin hefur veitt forvarnarverðlaunin Varbergið frá árinu 1999, en þau eru veitt þeim fyrirtækjum sem þótt hafa skara fram úr á sviði forvarna gegn óhöppum og slysum. 

"Þetta er mikið ánægjuefni og fyrst og fremst erum við geysilega stolt af þessu. Starfsfólkið okkar er lykillinn að þessari viðurkenningu,“ segir Einar Valur Kristjánsson framkvæmdastjóri Hraðfrystihússins Gunnvarar í Hnífsdal, en hann veitti verðlaununum viðtöku úr hendi Sigurðar Viðarssonar forstjóra Tryggingamiðstöðvarinnar í hádegishléi starfsmanna.

Einar Valur segir að forsendan fyrir góðum árangri sé sú að litlar mannabreytingar hafi orðið hjá fyrirtækinu. ,,Starfsmenn okkar halda vel utan um hlutina og hvern annan, t.d. eru mikið til sömu mennirnir á skipunum okkar,“ segir hann. 

Um Hraðfrystihúsið Gunnvöru hf. segja sérfræðingar TM í forvörnum að fyrirtækið búi að öflugri liðsheild starfsmanna sem leggja grunninn að því að öllum framleiðslu, gæða- og öryggisstuðlum sé fullnægt. Að mati sérfræðinga TM er öryggishegðun mjög sterk innan HG, því fyrirtækið hefur lent í fáum slysum. Öryggisvitund og forvarnir skili árangri sem um munar, sem felist í fækkun slysa og veikinda.